QR Prezidenti Nursultan Nazarbaev respýblikalyq joldarǵa bólinetin qarajatty qaita qarastyryp, oblystar ishindegi joldardyń qurylysyna bólýdi tapsyrdy, dep habarlaidy QazAqparat agenttigi.
«Mysaly, qazir shydai turatyn jobalar bolsa, onda ol qarajatty oblystyń ishindegi joldarǵa salý kerek. Adam óziniń úiine deiin jol kórmese, seniń salyp jatqan respýblikalyq jolyń nemenege kerek? Árkim aiaǵyndaǵy báteńkesi qysatyn bolsa, aldymen sony oilaidy. Sonda ǵana halyq kóredi. «Mine, jol salynyp jatyr» dep aitady. Bul jeke baǵdarlama («Nurly jol» - avt.), sony qaitadan qaraý qajet. Qarajatty qalai salýymyz kerek? Osyny pysyqtaýymyz qajet», - dedi N.Nazarbaev Úkimettiń keńeitilgen otyrysynda.
Prezidenttiń aitýynsha, joldardyń qurylysyna arnalǵan qarajatty qaita qarastyrǵan kezde biýdjet qarjysyn tiimdi igerýge basa nazar aýdarǵan jón. «Endi, eki aýdannyń arasyndaǵy joldy betonmen alty jolaq etip jasaýdyń qajeti joq. Eki jolaq, júrip turýǵa yńǵaily bolatyndai. Sosyn oblystyq biýdjetterdiń múmkindikterin paidalanǵan jón», - dep atap kórsetti Nazarbaev.
QR Investitsiialar jáne damý ministri Jeńis Qasymbektiń sózine qaraǵanda, aldaǵy ýaqytta jergilikti jerdegi joldardyń qurylysyna bólinetin qarjynyń kólemi artady. «Biz ákimdiktermen kelistik, qosymsha 60 mlrd teńge bólinedi. 30 mlrd teńgeni - Úkimet, qalǵan jartysyn - ákimdikter. Aldaǵy ýaqytta jyl saiyn 150 mlrd teńgeni bólinedi degen jospar bar. Ony da eki jaq bólip kóteredi. Biyl biz jergilikti jerde 4 000 shaqyrym joldy jóndep shyǵýdy josparlap otyrmyz», - deidi J.Qasymbek.
Aita keteiik, otyrysta Memleket basshysy Nursultan Nazarbaev «QazAvtoJol» ulttyq kompaniiasynyń jumysyn synǵa aldy.
