Búgin otandyq telearnalarda kórsetilgen BAQ ókilderine suhbat barysynda Qazaqstan Prezidenti Nursultan Nazarbaev elimizdegi dini ahýalǵa toqtaldy, dep habarlaidy "Ult aqparat".
«Qazirgi zamanda dini ahýal ylǵi da kóz aldymyzda bolýy kerek. Siriiada bolyp jatqan, bizdiń ishimizde de bolyp jatqan jaǵdailardy kórip otyrsyzdar. Áneý kúni barlyq moldalarmen kezdeskenimde ony aitqanmyn. Jaqynda olardyń bas qosýy bolyp, jańadan múfti sailandy. Ol jerde de aittym. Biz, qazaqstandyqtar - ziialy qaýymbyz, elmiz», - dedi Elbasy.
Qazaqstan Prezidenti din máselesi memleketten bólek turatyndyǵyn atap ótti.
«Degenmen ony basqarmasa bolmaidy. Sondyqtan ol jaqta ne aitylyp jatqanyn, kim meshit salyp jatqanyn egjei-tegjeili bilip otyrý úshin ministrlik quryldy. Ákesiniń atynan meshit salady, onyń ishinde ne aityp jatqanyn eshkim bilmeidi. Biz - memleketpiz. Memleket bolǵannan keiin onyń barlyǵyn qadaǵalaýymyz kerek», - dedi Nursultan Nazarbaev.
Memleket basshysy qazaq áielderi esh ýaqytta qara kiim kiip, tumshalanyp júrmegendigin basa aitty.
«Áielderdi ekinshi sorttaǵy adam sanaityn el emespiz. Ony da qaraý kerek. Saqaly beline túsken adamdardyń jalańaiaq shortymen júrgeni de bizge jaramaidy. Dinde ata-babamyzdan qalǵan jolymyz bar. Sonymen júrýimiz kerek. Meniń aitarym, barlyq memleketterde din jumysy memleket qolynda. Ol - Túrkiiada da, Saýd Arabiiasynda da, naǵyz musylmanbyz degen arab elderinde de bar. Biz de qadaǵalap otyrýymyz kerek», - dedi Memleket basshysy.
Qazaqstan Prezidenti búginde elimizde úsh myńǵa jaqyn meshit ashylǵandyǵyn eske saldy.
«Baram degeni barady, qai dinge baratynyn ózi biledi. Degenmen, elimizde eshqandai búlik shyǵarmaýy kerek. Basqa aǵymǵa, basqa sharýaǵa dindi buryp áketip, búlik shyǵaratyn terrorister shyqpaýy tiis», - dep basa aitty Elbasy.
