Bir kezeńde tumaý men koronavirýs indeti qabattasyp kelce, ol adam aǵzasyna aýyr tiedi.
Bul týraly QR DSM Taýarlar men kórsetiletin qyzmetterdiń sapasyn jáne qaýipsizdigin baqylaý komiteti Infektsiialyq aýrýlardy epidemiologiialyq qadaǵalaý basqarmasynyń basshysy Roza Qojapova aitty, dep habarlaidy QazAqparat.
«Antidene – bul aǵzanyń belgili bir aýrýdan qorǵanysy. Olar aýrýdy bastan keshirgennen soń nemese vaktsinatsiiadan keiin tabiǵi jolmen qalyptasady. Aǵzaǵa aýrý qozdyrǵyshy túsken kezde antidene olardy joiyp otyrady. Biraq, olar kez kelgen aýrýǵa qarsy tura almaidy. Eger adam qyzylshamen aýyrsa, onda antidene qyzylsha qozdyrǵyshyna yqpal etedi. Antidene adam aǵzasynda ártúrli saqtalady. Máselen, tumaýmen aýyrǵannan keiingi qorǵanys 6-8 aiǵa sozylady. Immýndyq kúshti qorǵanys bolǵanda qyzylshaǵa qarsy 5 jyl, difteriiaǵa 10 jylǵa deiin saqtalady. Barlyq aýrýǵa birdei merzim joq. Koronavirýs infektsiiasyna arnalǵan antidenege qatysty aitar bolsaq, bul - jańa aýrý. Belgili bir aýrýǵa qarsy antideneni anyqtaý, kóp jaǵdaida qansha ýaqyt saqtalatyndyǵyn bilý úshin ǵylymi-zertteý jumystary uzaq ýaqyt boiy júrgiziledi. Bir kezeńde tumaý men koronavirýs indeti qabattasyp kelgende aǵza aýrýdy aýyr ótkeredi. Sondyqtan dál qazir tumaýdan barynsha qorǵanýǵa keńes berilip otyr. Aýrýlar qabattasqan kezde óte aýyr tiedi», - dedi ol.
Onyń aitýynsha, virýstyq infektsiialarmen kúrestiń túrli ádisteri bar. Olar juǵý joldaryna, qorǵanys ádisterine bailanysty. Máselen, virýstyq infektsiiaǵa qarsy vaktsinatsiia juqpaly aýrýmen kúrestiń tiimdi ádisi sanalady. Al qarsy qoldanylatyn vaktsinatsiiasy joq infektsiialar juǵý joldaryna bailanysty. Tumaý, koronavirýs syndy aýa-tamshy jolymen taralatyn infektsiialardan qorǵanýdyń basty ádisi – maska taǵý, qoldy tazalap jýý, adamdar kóp jinalatyn jerge barmaý, adamdar kóp shoǵyrlanǵan jabyq ǵimaratta bolmaý.
«Eger adamnyń negizgi aýrýy bolsa, onda kez kelgen juqpaly aýrý óte aýyr ótedi. Qant diabeti, júrek-qan tamyry aýrýlary kezinde immýnnyń qarsy turýy qiynǵa soǵady. Bizde emdeýdiń bekitilgen klinikalyq hattamasy bar. Atalǵan hattamaǵa sáikes em taǵaiyndalady. Árine, adamda negizgi aýrý bolsa, onda túzetý engiziledi. Eger bazalyq dárini turaqty túrde qabyldaýy qajet bolǵan jaǵdaida koronavirýs infektsiiasyna qarsy dárini taǵaiyndaý barysynda eskeriledi», - dedi ol.
Basqarma basshysynyń aitýynsha, kez kelgen aýrýdan jazylyp shyqqannan keiin densaýlyqqa jiti qarap, dene qyzýyn baqylaýda ustaǵan jón. Aǵzaǵa qosymsha júkteme de túsirýge bolmaidy. Jaqsy tamaqtanyp, dárýmender ishý qajet.
«Al koronavirýstan qorǵaný usynystary - maska rejimin, áleýmettik araqashyqtyqty saqtaý, aýyrǵan adammen bailanyspaý, buqaralyq sharalarǵa barmaý, bólme aýasyn únemi tazartý. Bul sharalardy kez kelgen adam oryndai alady», - dedi Roza Qojapova.
