Foto:egemen.kz
Búgin Parlament Májilisi otyrysynda depýtat Abzal Quspan Qazaqstannyń batys óńirindegi kiikke qatysty jáne sol kiiktiń shamadan tys kóbeiýýi saldarynan týyndaǵan jergilikti sharýalar máselesin kóterip, QR Bas Prokýrory Berik Asylovqa depýtattyq saýal joldady, dep habarlaidy "Ult Aqparat".
Abzal Quspan kiiktiń derivattary, iaǵni múiizi úshin sottalyp jatqandar – ań atýdy kásip qylǵan brakonerler nemese uiymdasqan qylmystyq toptar emes, qarapaiym aýyl turǵyndary ekenin aityp, olardyń jazyqsyz sottalyp jatqanyn aitty. Depýtat óz sózinde sottalǵan azamattardyń týystarymen júzdeskenin jetkizdi de, Sot pen Úkimettiń áreketin synǵa aldy.
Depýtattyq saýaldyń tolyq nusqasy:
Qurmetti Berik Noǵaiuly!
Elimizdiń batys óńirindegi kiikke qatysty jáne sol kiiktiń shamadan tys kóbeiýýi saldarynan týyndaǵan jergilikti sharýalar máselesin byltyrdan beri turaqty túrde kóterip kelemin, alaida Úkimet bul máselelerdi sheshýde qaýqarsyzdyq tanytýda.
Búgin, osydan týyndaǵan jáne bir másele – kiiktiń derivattary úshin kórineý zańsyz, ádiletsiz sottalyp jatqan aýyl azamattarynyń jaǵdaiyn aitamyn. Iá aǵaiyn, kiiktiń derivattary, iaǵni múiizi úshin sottalyp jatqandar – ań atýdy kásip qylǵan brakonerler emes nemese uiymdasqan qylmystyq toptar emes, qarapaiym aýyl turǵyndary.
Olardy ádiletsiz sottaldy deýime naqty dálelim, men oqyp tanysqan júzden astam sot aktileri. Kiikti atpaǵan, biraq onyń múiizin satqan (jinaǵan, saqtaǵan, tasymaldaǵan) adamdardy qorshaǵan ortaǵa milliondaǵan, tipti milliardtaǵan teńgege zalal keltirdi dep, jappai sottaý praktikasy 2021 jyldyń tamyz aiynan bastaldy. Oǵan negiz myna meniń qolymdaǵy, Joǵarǵy Sottyń sol kezdegi qylmystyq ister jónindegi alqa tóraǵasy bolǵan Abdrashit Júkenovtyń oblystyq sot basshylaryna joldaǵan nusqaý haty. Hat qylmystyq kodekstiń 339 babyn túsindirý/raziasnenie dep atalǵanymen, máni boiynsha tikelei nusqaý formasynda rásimdelgen. Ol hattyń jazylýyna, óz kezeginde sol kezdegi bas prokýror Ǵizat Nurdiýletovtiń aqparaty negiz bolǵan.
Osynyń saldarynan, kiikti atýǵa qatysy joq azamattar buryn qylmystyq kodekstiń 339 babynyń 1 bóligimen sottalyp kelse, 2021 jyldyń tamyz aiynan bastap, olardyń áreketi sol baptyń 3 bóligimen dárejelenip, moiyndaryna júzdegen millionnan birneshe milliardtaǵan somaǵa aiyppuldar salynyp, naqty bas bostandyǵynan aiyrýǵa sottalýda.
Bul jerde men zerdelegen sot aktilerindegi negizgi qatelik ol, kez-kelgen qylmystyq iske qatysty qoldanylatyn basty printsip – qylmystyq áreketpen odan kelgen zalaldyń arasyndaǵy sebep-saldarlyq bailanystyń (prichinno sledstvennaia sviaz) anyqtalmaýy. Barlyq jaǵdaida is bir stsenariimen júredi, kiiktiń múiizderi tabylady, is qozǵalyp, Úkimet tarapynan ekologiia ministrliginiń ýákiletti komiteti arqyly kiiktiń quny shyǵarylady (bir kiik 2,5 mln), al tergeý organdary men sot azamatty kiikti óltirý arqyly tabiǵatqa asa iri mólsherde ziian keltirgeni úshin sottaidy. Ol kiiktiń ólý sebebi, óz ajalynan ba, tabiǵi apatty jaǵdailar ma, basqa qarýly adamdar toby atyp óltirdi me, tergeý de, sot ta anyqtamaidy! Odan basqa, sot sol kiiktiń múiizderin bir tiyndyq quny joqtyǵy sebepti, qajettiligi bolmaýyna bailanysty órteýge úkim shyǵarady. Sottyń da, Úkimettiń de áreketterinde zań bylai tursyn, eshqandai logika joq!
Men jaz aiynda osy jaǵdailarmen sottalǵan azamattardyń týystarymen júzdestim, BQO advokattar alqasynda jinalys ótkizdim, ózim biletin sýdialarǵa da jolyqtym, báriniń aitatyny – Joǵarǵy sottan kelgen nusqaý hat, boldy!
Pavlodar qalasyndaǵy túrmede jazasyn ótep jatqandarmen de kezdestim. Ol jerde 58 azamat otyr, árqaisysynyń moinynda myna ǵumyrlarynda ótep bola almaityn zalal bar, osynyń saldarynan kóptegen otbasylar ajyrasýda. Eń soraqysy, ishterinde birde-bir brakoner joq, esesine Aýǵan soǵysynda basynan zaqym alyp, júike aýrýlary saldarynan óz áreketine jaýap bere almaityn azamat otyr.
Qurmetti Berik Noǵaiuly!
Konstitýtsiiamyzǵa sáikes, Siz Respýblikadaǵy barlyq zańdardyń múltiksiz oryndalýyn qamatamasyz etetin, eń joǵarǵy qadaǵalaýshy organnyń basshysy retinde,
1. Sizge deiingi, Bas Prokýror tarapynan Joǵarǵy Sotqa joldanǵan aqparatty keri qaitarýdy;
2. Joǵarǵy Sottyń oblsot tóraǵalaryna joldaǵan 2021 jylǵy tamyzdaǵy nusqaý-hattyń kúshin joiýǵa,
3. Qylmystyq kodekstiń 339 baby, 3 bóligimen shyqqan sot Úkimderine taldaý júrgizip, narazylyq berýdi suraimyn.
Sol arqyly, ár sýdianyń isti qaraý barysyndaǵy táýelsizdigi týraly Konstitýtsiialyq normanyń saqtalýyna, ádiletti sot praktikasyn qalyptastyrýǵa jáne zańsyz sottalǵan azamattardyń Konstitýtsiialyq quqyqtarynyń saqtalýyna yqpal etetin bolasyz.
