Belgili zańger Abzal Quspan Qazaqstanda 1 mln teńgege jalǵan kýálik istetip, 2 mln-ǵa 140 ball alýǵa bolatynyn jetkizdi. Bul týraly advokat "Qasqa Jol" baǵdarlamasyna bergen suhbatynda aitty dep habarlaidy KAZ.NUR.KZ.
Advokattyń sózinshe, zańger Tursynbek Qabatovtyń qyzynyń Ulttyq biryńǵai testileýge jalǵan qujatpen kirgeni týraly elge jariia etken soń oǵan testileýdegi túrli zańsyzdyqtar týraly hattar kele bastaǵan.
«Men UBT-ta zańsyz jolmen joǵary ball alýdyń ortasha baǵasyn bilip qoidym. 1,5 – 2 mln teńgeń bolsa siz 120-140 ball alyp shyǵasyz. Kepildigimen. Al bylai qarasańyz sol UBT bolatyn jerde Ulttyq qaýipsizdik qyzmetinen bastap barlyq quqyq qorǵaý organdary júredi. Kameralar ornatylǵan. Sonyń ózinde jolyn tabýǵa bolady eken. Bul respýblika boiynsha qanat jaiǵan másele»,- dedi Abzal Quspan.
Advokat sonymen birge Qazaqstanda jalǵan kýálik daiyndaý indýstriiasy qatty damyp ketkenin málimdedi.
«Jalǵan qujat ázirleý óte ońai bolyp ketti. Qazir onymen ainalysatyn qylmystyq toptar belgili bolyp jatyr. Meniń estýimshe, 1 mln teńgeniń tóńiregindegi aqshaǵa jeke kýálik daiyndata alasyz», - dep aitty ol.
Eske salsaq, belgili ázilkesh Tursynbek Qabatovtyń qyzy Ádemi Amanǵalidyń ornyna Ulttyq biryńǵai testileýge ózge adamnyń jalǵan kýálikpen kirgenin quqyq qorǵaý organdary 15 maýsymda anyqtaǵan. Alaida ony áleýmettik jelige «senimdi derekkózderdiń» berýimen Abzal Quspan jaqynda saldy.
