Qazaqstanda áýe qatynasy qalpyna kelýine bailanysty áýejailar men áýe kompaniialary qandai sharttardy eskerýi tiis? Bul máselege qatysty «Atameken» UKP basqarma tóraǵasy Abylai Myrzahmetov pikir bildirdi, dep habarlaidy QazAqparat
«Shetelde qalyp ketken azamattarymyzdy alyp kelý nemese sheteldik mamandardy elderine qaitarýǵa qatysty keibir charterlik reisterdiń oryndalǵany bolmasa eldegi áýe kompaniialary osyǵan deiin amalsyz toqtap turdy. Árine jumysy toqtaǵannan keiin olar tabystan qaǵyldy. Moiyndarynda nesieleri, ujymyna berýi tiis ailyǵy siiaqty shyǵyndary bar. Jalpy álemdik jaǵdaiǵa qarasaq, birinshi qatty qiyndyqty kórip jatqan biznes salalarynyń aldyńǵy leginde – áýejai men týrizm, artynsha qyzmet kórsetý salasy tur. Sondyqtan áýejailarǵa kómektesý kerek», - dedi Abylai Myrzahmetov Ulttyq kásipkerler palatasynyń Facebook paraqshasynda onlain rejimde sóilegen sózinde.
Palata basshysy áitse de jolaýshylardy tasymaldaǵanda áýejai ákimshiligi adamdardyń arasyndaǵy áleýmettik qashyqtyq erejesin saqtaýy kerektigin eske saldy.
«Osy erejelerdi eskersek, bir ushaqqa jolaýshylardy tolyqqandy alyp kirý qiyn bolady. Iaǵni olar shamamen 30-40 paiyz deńgeiinde jolaýshylardyń sanyn qysqartýy kerek. Onyń qalai bolatyny boiynsha sanitarlyq dárigerlermen, sarapshylarmen aqyldasqan abzal. Áýe kompaniialary osy erejelerdi saqtai otyryp, ushqan kezde shyǵyndaryn óte ala ma, joq pa – eseptelýi tiis. Ekinshiden áýe kompaniialarynyń negizgi shyǵyndary janarmaimen bailanysty. Munai arzandaǵannan keiin janarmaidyń baǵasy tómendedi. Muny da eskerip, bilettiń baǵasyn ósirmeý kerek. Iaǵni shyǵyn tutynýshylardyń moinyna ilinbeýi tiis», - dedi ol.
Eske sala ketsek QR Prezidenti Qasym-Jomart Toqaev tótenshe jaǵdai rejimin biylǵy 11 mamyrǵa deiin uzartý jóninde sheshim qabyldady. Bul týraly Memleket basshysy búgingi málimdemesinde aitqan bolatyn.
