«Atameken» Ulttyq kásipkerler palatasynyń basqarma tóraǵasy Abylai Myrzahmetov monopolisterdiń artyq talabyna qalai toitarys berilip jatqanyn aityp berdi, dep habarlaidy QazAqparat.
«Jyl saiyn keri bailanyspen kásipkerlerden keletin júieli máselelerdi rettep otyrmyz. Onyń reestri de bar. Ol reestrde 600-den astam suraq bar. Ai saiyn Álihan Smaiylovtyń (Úkimet basshysynyń orynbasary) basqarýymen vedomstvoaralyq komissiia jumys júrgizedi. Sonyń esebinen 500-den astam suraqtyń 80 paiyzdan kóbiniń sheshimi tabyldy», - dedi Abylai Myrzahmetov Úkimet otyrysynda.
Palata basshysy naqty mysaldardy da keltirdi.
«Mysaly jergilikti jerde – gazben qamtylatyn 7-8 oblysta kásipkerler «monopolister aldyn ala aqsha tóleýdi surap, kásipkerlerge qysym kórsetetin. Sol másele sheshilip avans tóleý máselesi alynyp tastaldy. Odan bólek temir jol salasynda qosymsha joldar jeke menshikke berilgen. Ókinishke qarai ol jerde de monopoliialyq sheshimder qabyldanyp, ondaǵy tarifter qatty ósip ketken. Ásirese Aqmola men Qostanai oblysynada osy úrdis baiqaldy. Bul másele de rettelip, naqty ádisteme qabyldandy. Aita bersek osyndai aýqymdy jumys kóp», - dedi ol.
