Búgin, 27 qańtarda Ábý-Dabidegi «Manarat ál Saadiiat» mádeni ortalyǵynda Qazaqstan kinosy kúnderiniń ashylý saltanatynda rejisser Doshan Joljaqsynovtyń «Qunanbai» filmi kórsetiledi, dep habarlaidy «Qazaqfilmniń» baspasóz bólimi.
Kinostýdiianyń málimetinshe, mádeni is-shara Qazaqstan Respýblikasynyń Prezidenti Qasym-Jomart Toqaevtyń Birikken Arab Ámirlikterine resmi sapary aiasynda uiymdastyrylǵan.
«Qunanbai» kinosynan bólek, «Qazaq bii» derekti filmi kórsetiledi. Bul týyndynyń rejisserleri – Ánýar Sadyqova jáne Ǵaziz Nasyrov. Derekti filmde jas balerina, A.Seleznev atyndaǵy Almaty horeografiia ýchilishesiniń stýdenti, halyqaralyq baiqaýlardyń laýreaty Janel Ulanovanyń óneri arqyly qazaq biiniń tarihy baiandalady.
Al erteń, 28 qańtarda rejisser Rústem Ábdirashevtiń «Qazaq handyǵy» tarihi kinodiologiiasynyń eki birdei maýsymy – «Almas qylysh» jáne «Altyn taq» filmderi usynylady. Bul týyndylardyń stsenarii Iliias Esenberlinniń «Kóshpendiler» trilogiiasynyń «Almas qylysh» atty birinshi romanynyń negizinde jazylǵan. «Qazaq handyǵy» aýqymdy tarihi jobanyń ideia avtory – QR Tuńǵysh Prezidenti – Elbasy N.Á.Nazarbaev.
Qazaqstan kinosy kúnderiniń sońǵy kúni, 29 qańtarda rejisser Aqan Sataevtyń «Elbasy joly. Astana» jáne rejisser Djeff Vespanyń «Ámire» filmderi kórsetiledi.
Týyndylardyń barlyǵy qazaq tilinde (aǵylshyn tilindegi titrleri bar) usynylatyn bolady.
