«Abý-dabi plaza» qurylys alańyndaǵy baqylaý-ótkizý beketinde quqyq qorǵaý organdarynyń zańdy talaptaryna baǵynbaǵan 8 adamǵa ákimshilik shara qoldanyldy. Bul týraly Astana qalalyq IID-niń baspasóz qyzmeti habarlady.
2 qyrkúiekte saǵat 21.00-de kúzet kompaniiasynyń qyzmetkerleri men sheteldik jumysshylar (Úndistan azamattary) arasynda «Abý-dabi Plaza» qurylys alańynyń baqylaý-ótkizý beketinde turmystyq sipattaǵy janjal oryn alǵan.
Oqiǵa ornyna memlekettik qurylymdar men quqyq qorǵaý organdarynyń ókilderi keldi. Jedel sharalar arqyly oqiǵanyń aldy alyndy.
Alaida, birqatar azamattar qoǵamdyq tártipti buzyp, jaǵdaidy ýshyqtyrmaqshy bolǵan. «Esil» aýdandyq prokýrory tártip buzýshylardy jaýapqa tartatyny týraly resmi eskertý jasady. Eskertýge qaramastan azamattar quqyq qorǵaý organdarynyń zańdy talaptaryna baǵynbai, qoǵamdyq tártipti buzýdy jalǵastyrdy.
Zańsyz áreketterdiń aldyn alý úshin tártip buzýshylar toby aty-jónin anyqtaý jáne tekserý úshin «Esil» aýdandyq IIB-ǵa jetkizilip, 8 tulǵaǵa qatysty ákimshilik jaýap túrindegi sharalar qoldanylyp, ákimshilik óndiris qozǵaldy. Tekserý jáne sheshim shyǵarý úshin materialdar ákimshilik sotqa joldandy. Qalǵan ustalýshylar profilaktikalyq áńgimelesýden keiin jiberildi.
Qaqtyǵys saldarynan Úndistannyń eki azamaty túrli dene jaraqatymen meditsinalyq mekemege jetkizildi.
«Azamattardyń dáieksiz aqparattar men túrli ósek-aiańdardy taratpaýlaryn suraimyz. Eske sala ketsek, qasaqana jalǵan aqparat taratqany úshin qylmystyq jaýapkershilik qarastyrylǵan (QR QK-niń 274-baby)», - delingen Astana qalalyq IID taratqan habarlamada.
