«Ábý-Dabi Plaza»-da jumys isteitin sheteldik mamandardyń jalaqysy jergilikti jumysshylardan tómen, dep habarlaidy QazAqparat tilshisi.
QR Eńbek jáne halyqty áleýmettik qorǵaý vitse-ministri Nurjan Áltaevtiń aitýynsha, ótken jyly qazaqstandyq jumysshylardyń jalaqysy joǵary bolǵan.
«Máselen, ótken jyldyń tekserisi boiynsha qazaqstandyq jumysshylardyń jalaqysy sheteldik mamandardan sál joǵary ekeni anyqtaldy. Jańylmasam, ol jerde sheteldik jumysshylardyń ortasha jalaqysy 300 dollardyń shamasynda. Bizdikiler sál joǵary alady», - dedi N.Áltaev búgin Astanada ótken baspasóz máslihatynda.
Budan bólek, vitse-ministr jumystan shyǵarylǵan jumysshylar máselesine de toqtaldy. Onyń sózine qaraǵanda, olardyń barlyǵy memlekettik qoldaý sharalaryn paidalanyp, qyzmetke tura alady.
«Búginde Astana qalasynda 4,5 myń bos jumys orny bar. Biz ol vakansiialardy jumysshylarǵa kórsettik. Jumysqa shyǵatyn bolsańyz, sol jerge baryp, turýǵa bolady dedik. 4,5 myń vakansiianyń ishinde 200-i qurylys salasyna qarasty. Biraq ol azamattar buǵan onsha qyzyǵýshylyq tanytqan joq. Óitkeni olardyń basty talaby - ótemaqy alý. Negizi, zańmen ol ótemaqy belgilenbegen. Óitkeni Eńbek kodeksiniń birinshi babynda anyq jazylǵan, eger adam ýaqytsha jumysqa alynsa, onda eshqandai ótemaqy tólenbeidi. Al bir-eki jylǵa kelisimshart jasalǵanda alty aidyn keiin qysqartý bolsa, sonda ǵana eki ailyq ótemaqy tólenýi tiis. Osy joly kompaniia ókilderi óz erkimen bir ailyq tólemaqyny berýge kelisti», - dep atap kórsetti N.Áltaev.
