Shyǵystanýshy, dintanýshy, ádebiet zertteýshisi, filologiia ǵylymdarynyń doktory, Qazaqstannyń búrynǵy bas múftii Ábsattar Derbisáli dúnieden ótti, dep habarlaidy "Ult aqparat".
Bul jaiynda búgin Aqparat jáne qoǵamdyq damý ministri Aida Balaeva áleýmettik jelidegi paraqshasynda jazdy.
«Belgili dintanýshy, shyǵystanýshy, islamtanýshy ǵalym Ábsattar qajy Derbisáliniń ómirden ozýyna bailanysty marqumnyń otbasy men jaqyn-týǵandarynyń qaiǵylaryna ortaqtasyp kóńil aitamyn. Bul búkil qazaq rýhaniiatyna ortaq aýyr qaiǵy. Ábsattar Baǵysbaiuly búkil sanaly ǵumyryn imandylyqqa arnap, asyl dinimizdiń týra jolyn halyqqa durys jetkizý isine ólsheýsiz eńbek sińirdi. Elimizdiń Bas múftii laýazymynda júrgen ýaqytta qajy aǵamyzben qyzmet barysynda jolyǵysyp turdyq. Qai kezde de óziniń keń minezimen, tereń bilimimen, parasatty bolmysymen rýhaniiat biiginen kórinip, elimizdegi ultaralyq kelisim men dinaralyq tatýlyqtyń órken jaiýyna ólsheýsiz úles qosqan jan edi. Ábsattar qajy aǵamyzdyń ziialy bolmysy, eline sińirgen eńbegi, jazǵan rýhani shyǵarmalary, jamaǵatty iman jolyna shaqyrýda aitqan aqyl sózderi – eshqashan tozbas rýhani qazyna bolyp halqynyń jadynda máńgilik saqtalady. Marqumnyń jatqan jeri jaryq, topyraǵy torqa bolyp, nury peiishte shalqysyn» dep jazdy ministr Instagram paraqshasynda.
Ábsattar Baǵysbaiuly 1947 jyly 15 qyrkúiekte qazirgi Túrkistan oblysy Túlkibas aýdanynda týǵan.
1969 jyly M.Áýezov atyndaǵy Ońtústik Qazaqstan memlekettik ýniversitetiniń filologiia fakýltetin úzdik bitirgen.
1970-1975 jyldary KSRO Ǵylym akademiiasy Máskeý Shyǵystaný institýtynda aspirant.
1975-1976 jyldary Marokko Koroldigi, 1985-1986 jyldary Týnis Arab Respýblikasy ýniversitetterinde arab tili men ádebieti boiynsha biliktilik arttyrýdan ótti. 1976-1977 jyldary QR ǴA-nyń M.O. Áýezov atyndaǵy Ádebiet jáne óner institýtynyń ǵylymi qyzmetkeri. 1977 jyly ál-Farabi atyndaǵy Qazaq ulttyq ýniversitetinde assistent, aǵa oqytýshy, dotsent, filologiia fakýlteti dekanynyń orynbasary, Shyǵys filologiia kafedrasynyń meńgerýshisi.
1986-1988 jyldary KSRO ǴA Moskva Shyǵystaný institýtynyń doktoranty. 1989 jyly Shyǵystaný fakýltetiniń dekany, 1991-1997 jyldary tilder jáne halyqaralyq bailanystar jónindegi prorektor.
1997-2000 jyldary Qazaqstan Respýblikasynyń Saýd Arabiiasy Koroldigindegi elshiliginiń keńesshisi, 1-synypty keńesshi diplomatiialyq laýazym iesi.
2000 jáne 2005 jyldary Qazaqstan musylmandarynyń III jáne IV Quryltailarynda Qazaqstan musylmandary dini basqarmasynyń tóraǵasy, Bas múfti, 2007 jyldary Ortalyq Aziia múftiler keńesinde biraýyzdan osy keńestiń tóraǵasy, 2000 jyly tamyzda Bosniia men Gertsegovinanyń astanasy Saraevoda jáne 2002 jyly sáýirde Kiprde ótken Eýraziia Islam Shýrasynyń IV-V halyqaralyq konferentsiialarynda osy uiym tóraǵasynyń birinshi orynbasary bolyp eki ret sailandy.
Á. Derbisáli – respýblikamyzdaǵy jas arabtaný ǵylymynyń negizin salýshylardyń biri.
Arabistika salasy boiynsha elimizdiń tuńǵysh ǵylym doktory, tuńǵysh professory, tuńǵysh akademigi. Qoja Ahmet Iasaýi kesenesi men ondaǵy qulyptastardaǵy jazýlardy ana tilimizge aýdaryp, zerttedi.
2003 jáne 2006 jyldary qyrkúiekte Astanada álemdik jáne dástúrli ulttyq din liderleriniń sezderin ótkizýge úles qosty.
Ábsattar qajy Derbisáli Qazaqstanda arab tili men ádebieti ǵylymyn qalyptastyrǵany jáne Islam tarihy men mádenieti, dinine bailanysty kóptegen súbeli eńbekteri úshin 2002 jyly Egipet Arab respýblikasynyń 1-dárejeli «Ǵylym jáne óner» ordenimen, Qazaqstan ǵylymy men bilimi, ádebieti men mádenietine qosqan qomaqty úlesi úshin 2004 jyly «Parasat» ordenimen jáne 2001 jyly «Qazaqstan Respýblikasynyń Táýelsizdigine 10 jyl», 2005 jyly «Qazaqstan Respýblikasynyń Konstitýtsiiasyna 10 jyl», 2008 jyly «Astanaǵa 10 jyl» merekelik medalderimen jáne 2007 jyly QR Bilim jáne Ǵylym ministriniń «Qazaqstan Respýblikasynyń ǵylymyn damytýǵa qosqan úlesi úshin» belgisimen marapattaldy.
2005 jyldyń qarashasynda Ońtústik Qazaqstan oblysy, Túlkibas aýdany maslihynyń sheshimimen «Túlkibas aýdanynyń qurmetti azamaty» jáne sol jyly Ońtústik Qazaqstan oblysy máslihatynyń sheshimimen «Ońtústik Qazaqstan oblysynyń qurmetti azamaty» ataqtary berildi.
Eki kún buryn QMDB baspasóz hatshysy Aǵabek Qonarbaiuly dintanýshy aýyr jaǵdaida jansaqtaý bólimine túskenin habarlaǵan edi.
