- Búgin «BTA Banki» AQ-nyń basqarma basshysynyń burynǵy orynbasary Jaqsylyq Jarymbetov arnaiy baspasóz máslixatyn ótkizip, ózine qatysty taralyp jatqan alyp-qashpa áńgimelerdi joqqa shyǵardy, dep xabarlaidy QazAqparat tilshisi.
Onyń aitýynsha, qańtardyń 17-si kúni Túrkiianyń shekara qyzmeti ony jalǵan tólqujatpen júrgeni úshin ustaǵan bolatyn. «Politsiia ýchaskesinde otyrǵanda men ózimniń shyn aty-jónimdi aittym. Sosyn Ystanbuldaǵy Qazaqstannyń resmi ókildiligine xabarlasýdy ótindim. Sóitip, qańtardyń 20-sy kúni meni Qazaqstanǵa ekstraditsiialady. Ertesinde meni tergeý abaqtysyna qamady. Osy ýaqytqa deiin sonda boldym. Maǵan eshqandai zorlyq-zombylyq pen qysymnyń jasalmaǵanyn málimdegim kelip otyr. Sebebi keibir úkimettik emes uiymdar men quqyq qorǵaý birlestikteri múldem basqa aqparat taratyp «meni qiyn jaǵdaiǵa tap boldy» dep xabarlady. Tipti, «meniń ómirime qaýip tónip tur» degen áńgime taratty. Osy aqparat shyndyqqa esh janaspaidy. Meniń isime saiasattyń eshbir qatysy joq», - dedi Jarymbetov.
Onyń sózine qaraǵanda, ol áli kúnge deiin «BTA Bank» isi boiynsha kúdikti bolyp sanalady. «Árine, keibir adamdar, olardyń ishinde Ábilázov ta bar, osyny óz múddesi úshin paidalanǵysy kelip otyr. Buqaralyq aqparat quraldaryna jalǵan málimetterdi salyp jatyr. Men taǵy da aitamyn, bul jerde saiasattyń eshbir qatysy joq. Tergeý abaqtysynda otyryp, maǵan eshqandai qysym jasalmady. Men týǵan-týystarymmen emin-erkin kezdesip júrdim. Qazir maǵan qatysty eshqaida shyqpaý týraly shara qoldanylyp, qolxat alyndy. Jaqyn arada otbasymmen qaýyshamyn. Shynymdy aitsam, osy qadamǵa buryn barý kerek edi», - dep atap kórsetti Jarymbetov.
Onyń qorǵaýshysy Óztemirov atalǵan iske qatysty sot óndirisiniń Almaty qalasynda ótetetinine senim bildirip otyr. Sebebi atalǵan qylmystyq is sol jerde qozǵalǵan bolatyn.
