Pavlodar oblysynyń ákimi Ábilqaiyr Sqaqov 2021 jylǵy basty jumys josparyn jariia etti, dep habarlaidy QazAqparat.
«Keler jyldyń jospary týraly da aita keteiin. Árine, bizdiń eń birinshi mindet – oblys turǵyndaryn jumyspen qamtý. Bul baǵytta osy jyldyń aiaǵyna deiin 33 myńnan astam adamdy jumyspen qamtysaq, aldaǵy jyly taǵy 35 myń turǵyndy eńbekke tartý jospary bar», - dedi Ábilqaiyr Sqaqov OKQ-da ótken baspasóz máslihatynda.
Oblys ákimi atap ótkendei, ekinshi mindet - shaǵyn jáne orta biznesti qoldaý jáne olardyń óndirisin ulǵaitý. Osy jyly pandemiia saldarynan taýarlardyń importy azaiǵany belgili, esesine otandyq ónimge suranys artqan. Ábilqaiyr Sqaqov bul ózgeristi shaǵyn jáne orta bizneske tapsyrys berýdi arttyrýdyń jáne importqa táýeldi bolmaýdyń myqty múmkindigi dep sanap otyr.
«Úshinshiden, memlekettik baǵdarlamalardy iske asyrýǵa basymdyq bermekpiz. Bulardyń karantinnen keiin halyqtyń ál-aýqatyn arttyrý úshin yqpaly zor. «Jumyspen qamtýdyń jol qartasy» aiasynda qolǵa alynatyn jobalar tizimi daiyn tur. «Nurly jer» boiynsha turǵyn úi salamyz, «Aýyl – el besigin» eldi mekenderdi abattandyrýǵa qoldanamyz, al «Biznestiń jol kartasy» arqyly nesie berý jalǵasady. Budan bólek, «Qarapaiym zattar ekonomikasy» siiaqty basqa baǵdarlamalardyń múmkindikterin barynsha paidalanamyz», - deidi Ábilqaiyr Sqaqov.
