Almaty turǵyndary asa kórnekti qalamger, Qazaqstannyń Eńbek Eri, Halyq jazýshysy, Uly Otan soǵysynyń ardageri Ábdijámil Kárimuly Nurpeiisovti sońǵy saparǵa shyǵaryp saldy, dep habarlaidy QazAqparat.
Qaraly jiynda Qazaqstan Respýblikasynyń Memlekettik hatshysy Erlan Karin Prezident Qasym-Jomart Toqaev kóńil aitý jedelhatyn oqyp berdi.
«Asa kórnekti qalamger, Qazaqstannyń Eńbek Eri, Halyq jazýshysy, Uly Otan soǵysynyń ardageri Ábdijámil Kárimuly Nurpeiisovtiń dúnieden ótýine bailanysty kóńil aitamyn. Ábdijámil Kárimuly surapyl soǵysty bastan keship, elge oralǵan soń, qazaq ádebietin órkendetýge súbeli úles qosty.
Uzaq jylǵy shyǵarmashylyq qyzmeti jemisti boldy. «Qan men ter» trilogiiasy, «Sońǵy paryz» dilogiiasy siiaqty týyndylary synshylarmen oqyrmandar tarapynan joǵary baǵa aldy. Zaman júgin kótergenromandary álemniń kóptegen tilderine aýdaryldy.
Ábdijámil Kárimulynyń jańa belesti baǵyndyrǵan qazaq ádebietin shetelge tanytýǵa sińirgen eńbegi orasan zor. Ol ult rýhaniiatynyń kóshbasshysy boldy.
Ábdijámil Nurpeiisov adam janyn tereń túsinetin, túrli taǵdyrdyń beinesin kórkem sýrettei otyryp oqyrmanǵa jetkizgen oily, keń tynysty jazýshy bolatyn. Ómir boiy qolynan qalamy túsken joq. Qazaq eliniń rýhani-mádeni salasyn damytý jolynda ólsheýsiz qyzmet atqardy.
Ol - ult klassikteriniń jolyn laiyqty jalǵastyrǵan qýatty qalamger. Solaisha, ózi de qazaq ádebietiniń patriarhyna ainaldy.
Ábdijámil Nurpeiisovtiń sońynda urpaqqa úlgi, ulysqa igilik bolatyn shyǵarmalary qaldy. Elge es, syrtqa ses bolǵan jazýshynyń endi ekinshi ómiri bastaldy.
Ónegeli ǵumyr keship, sońynda mol mura qaldyrǵan Ábdijámil Kárimulynyń jarqyn beinesi umytylmaidy.
Halqymyz esimin árdaiym ardaq tutady. Marqumnyń imany salamat, jany jánnatta bolsyn», - delingen kóńil aitý jedelhatynda.
