Ábdijámil Kárimuly Nurpeiisov 1924 jyly 22 qazanda Qyzylorda oblysy, Aral aýdanynyń Qulandy aýyldyq keńesine qarasty Úshkóń degen jerde dúniege kelgen. Ol - Qazaqstannyń halyq jazýshysy, XX ǵasyrda qazaq ádebietine zor úles qosqan sýretkerlerdiń biri, qoǵam qairatkeri.
1942-1945 jyldary Uly Otan soǵysyna qatysqan.
1956 jyly M.Gorkii atyndaǵy Ádebiet institýtyn bitirgen. 1962-1964 jyldary «Juldyz» jýrnalynyń bas redaktory boldy. Halyqaralyq Qazaq PEN klýbyna jetekshilik jasady.
Ádebietke 1947 jyldan aralasa bastaǵan qalamgerdiń tuńǵysh shyǵarmasy - Uly Otan soǵysy taqyrybyna arnalǵan «Kýrliandiia» romany 1950 jyly jaryq kórdi. Bul shyǵarmasy úshin jazýshyǵa Jambyl atyndaǵy respýblikalyq syilyq berildi. Keiin qalamger «Kýrliandiia» romanyn óńdep, tolyqtyryp, 1958 jyly «Kútken kún» degen atpen qaita jariialady.
Sondai-aq, onyń «Qan men ter» trilogiiasy (1-kitap – «Ymyrt», 1961; 2-kitap – «Sergeldeń», 1964; 3-kitap – «Kúireý», 1970) jáne «Seń» (1983), «Sońǵy paryz» (1999) romandary Dúnie júzi halyqtarynyń kóptegen tilderine aýdarylǵan.
Tańdamaly ádebi-syn maqalalary «Tolǵaý» (keiinnen «Júregi toly jyr edi») degen atpen qazaq jáne orys tilderinde jeke kitap bop shyqty (1972), 1985 jyly «Aqbidai týraly ańyz» atty ocherkter jinaǵy jaryq kórdi.
A.P.Chehovtyń, A.M.Gorkiidiń, Nazym Hikmettiń, ispan jazýshysy A.Kesonyń shyǵarmalaryn qazaq tiline aýdarǵan.
Ol - KSRO Memlekettik syilyǵynyń laýreaty (1974). 2001 jyly Máskeýdegi Halyqaralyq Ádebi qordyń «Za chest i dostoinstvo», 2003 jyly Halyqaralyq M.Sholohov atyndaǵy syilyqtardyń laýreaty atandy. Kóptegen orlen-medaldarmen marapattalǵan. 1985 jyly Qazaq KSR Halyq jazýshysy qurmetti ataǵy berildi.
2019 jyly jazýshy 95 jasyn atap ótti. Sol kezde Prezident oǵan erekshe belgi bergen edi. "Siz bizdiń halqymyzǵa kereksiz", - dedi Toqaev Nurpeiisovke.
Ult portalynyń ujymy qazaq jurtyna qadirli bolǵan kórnekti qalamgerdiń dúnieden ozýyna bailanysty onyń otbasy men týǵan-týystaryna qaiǵyryp kóńil aitady.
Marqumnyń jatqan jeri jaily, topyraǵy torqa bolsyn. Peiishte nury shalqyp, Jaratqan artyndaǵy urpaǵyna uzaq ǵumyr bersin!
