Qyzylorda oblysynyń ákimi Gúlshara Ábdiqalyqova aimaq turǵyndaryna vaktsinaǵa bailanysty úndeý jariialady, dep habarlaidy "Ult aqparat".
Óz úndeýinde oblys ákimi elimizde halyqqa jappai ekpe egý júrip jatqanyn atap ótken.
«Jalpy, vaktsina saldyrý densaýlyǵymyzǵa qorǵanysh ekenin eskersek deimin. Mamandardyń aitýynsha, ekpeden keiin koronavirýsqa qarsy immýnitet qalyptasady. Ekpeni alǵash alǵannan keiin ekinshi dozasyn belgili bir ýaqytta alý qajet. Sodan soń ǵana aǵzany qorǵaityn antideneniń jetkilikti dárejesi túziledi. «Vaktsina aldym» dep maskasyz júrýge bolmaidy. Elimizdegi eresek adamdardyń 60 paiyzy vaktsina alyp, ujymdyq immýnitet paida bolǵanǵa deiin maska taǵyp júrýimiz kerek.
Vaktsinalaýǵa qarsy pikirdegi adamdar burynnan da bolǵan. Koronavirýsqa qarsy vaktsinaǵa ǵana emes, ondai adamdar ekpeniń kez kelgen túrine qarsy pikirde. Biraq, qazirgi pandemiia jaǵdaiynan tek sol arqyly ǵana shyǵa alamyz. Máselen, álemniń aldyńǵy qatarly elderi atalǵan isti byltyrǵy jeltoqsan aiynda bastap ketti», - dedi oblys ákimi.
Aimaq basshysy úndeýinde qazir dúniejúzinde 150 millionnan astam adam virýs juqtyrǵanyn, sonyń 3 millionnan astamy dúnieden ótkenine toqtaldy. Onyń aitýynsha, koronavirýsty jeńýdiń jalǵyz amaly - vaktsinalaý. Álemdegi AQSh, Germaniia, Frantsiia, Japoniia memleketteri jappai vaktsinalaýdy qolǵa aldy.
«Jappai vaktsinalaý bizge ne beredi? Qazirgi tańda bas sanitarlyq dárigerdiń qaýlysyna sáikes óńirlerdegi uiymdar men keńselerde «qyzyl aimaqta» - qyzmetkerlerdiń 80, «sary» aimaqta - 50, «jasyl» aimaqta - 30% qashyqtan jumys isteýde. Eger qyzmetkerlerdiń 90%-y vaktsina alǵan bolsa, olar jumysqa tolyq jiberilip, tek 10%-y qashyqtan jumys isteidi. Osyny eskerip, búgingi kúni biýdjettik mekemeler qyzmetkerleri, atap aitqanda, memlekettik qyzmetkerler, muǵalimder men dárigerler, quqyq qorǵaý organdary jappai vaktsina alýda. Syr eliniń óner maitalmandary, jyrshy-jyraýlary, jazýshy-aqyndary, aityskerleri, jýrnalister qaýymy eldik isten qalys qalmasa deimiz. Endigi rette halyqpen tyǵyz qarym-qatynas jasaityn kásipkerler, bazarlardaǵy satýshylar, kafe, meiramhana, halyqqa turmystyq qyzmet kórsetý qyzmetkerleri vaktsina alýdyń kóptegen múmkindikterge jol ashatynyn túsinip jatsa jón bolar edi. Óz densaýlyǵymyzǵa nemquraily qaramaiyq. Ózgeniń densaýlyǵyna qaýip tóndirmeiik. Qaýeset sózderge ermeiik. Sizderdi mamandardyń sózin tyńdap, mán berýge shaqyramyn», - dep atap ótti Gúlshara Ábdiqalyqova.
