Sporttyń basym baǵyttary boiynsha qarjylandyrý limitin zańnamalyq deńgeide qarastyrý qajet. Bul týraly Parlament Májilisi Áleýmettik-mádeni damý komitetiniń tóraiymy Gúlshara Ábdiqalyqova málim etti, dep habarlaidy "Ult aqparat".
«Qoldanystaǵy normativterdi qaita qarap, árbir eldi mekenniń sport ǵimaratyna degen naqty qajettiligine taldaý júrgizgen durys dep eseptemiz. Búginde sport salasynda memlekettik-jekeshelik áriptestik baǵytynda 105 joba ǵana bar. Onyń 22-sin jergilikti atqarýshy organdar iske asyrýda. Jalpy kólemi 600 myń sharshy metrden astam sport ǵimarattary qajet bolyp otyrǵan kezde, bul jobalardyń jetkiliksiz ekendigi kózge kórinip tur. Sondyqtan bizde qarjylandyrýdyń memlekettik emes kózderin izdeý kerek. Sol sebepti memlekettik-jekeshelik áriptestik tetigin belsendi túrde qoldana otyryp, demeýshilerdiń qarajatyn tartý máselesi sheshimniń tiimdi joldarynyń biri dep esepteimiz», - dedi Gúlshara Ábdiqalyqova Parlament Májilisindegi Úkimet saǵatynda.
Beiimdelgen dene shynyqtyrý men sportty damytýǵa járdemdesý máselesine toqtalǵan ol, bul taqyryp erekshe nazar aýdarýdy talap etetinin jetkizdi. Atap aitqanda, oqýshylar saraiy men úileriniń, sport mektepteriniń bazasynda beiimdelgen sport sektsiialaryn ashyp, arnaiy mamandar daiarlaý qajet.
«Jyldar boiy dene shynyqtyrý men sport salasy qaldyq printsipi boiynsha qarjylandyrylyp kelgeni belgili. Taldaý kórsetip otyrǵandai, jergilikti jerlerde qarajatty josparlaǵan kezde úilesimsizdik baiqalady. Mysaly, fýtboldy qarjylandyrýǵa jergilikti biýdjetten sporttyń barlyq túrine bólingen qarjattan úshten bir bóligi jumsalady. Al keibir óńirlerde tipti biýdjettiń jartysy osy baǵytta jumsalatyn kórinedi. Sondyqtan sporttyń basym baǵyttary boiynsha qarjylandyrý limitin zańnamalyq deńgeide qarastyrý qajet», - dedi depýtat.
