Úkimet basshysynyń orynbasary Gúlshara Ábdiqalyqova jańa oqý jylynyń jaqyndaýyna orai birneshe máselege nazar aýdarý kerektigin málim etti, dep habarlaidy QazAqparat.
«Jańa oqý jylynyń bastalýyna birneshe apta qaldy. Soǵan bailanysty Bilim jáne ǵylym ministri men óńir basshylarynyń nazaryn birneshe máselege aýdarǵym keledi. Birinshiden, sońǵy jyldary birinshi synypqa keletin oqýshylardyń sany kóbeiýde. Soǵan bailanysty oqýshy oryndarynyń jetispeýshiligi ulǵaiyp keledi. Sondyqtan, oqytýdyń qaýipsiz jaǵdaiyn jasaý úshin ákimder mektep direktorlarymen, ata-analarmen birlesip, balalaryn beiimdelý, sabaq rejiminiń sanitarlyq-epidemiologiialyq normalarǵa sáikestigi máselelerine erekshe nazar aýdarǵan jón», - dedi Gúlshara Ábdiqalyqova Úkimet otyrysynda.
Premer-ministrdiń orynbasary ekinshiden, alys aýyldardan oqýshylardy tasymaldaý máselesi baryn atap ótti.
«Osyǵan bailanysty 184 kólik jetispeýde. Bul másele nazardan tys qalmaýy tiis. Ákimdikterde Memleket basshysynyń tapsyrmasy boiynsha kópbalaly otbasylardan shyqqan talapkerler úshin bólingen qosymsha 5 myń grant berý jónindegi jumysty aiaqtaýdy suraimyn», - dedi ol.
Eske sala ketsek, búgingi Úkimet otyrysynda Premer-ministr Asqar Mamin óńir ákimderine barlyq bilim berý uiymdary jumysty bastaýǵa 100 paiyz daiyn bolýy kerektigin tapsyrǵan bolatyn.
