10-11 tamyz kúnderi Abai kúni jáne uly aqynnyń 175 jyldyq mereitoiyna orai respýblikalyq deńgeide onlain poeziia festivali ótti, dep habarlaidy "Ult aqparat".
Sharany uiymdastyrýshy Qazaqstan halqy Assambleiasynan málim etkendei, festivaldiń negizgi maqsaty – aǵartýshy-aqynnyń shyǵarmashylyq murasyn nasihattaý, memlekettik tildi qoldanýdy keńeitý.
Poeziia festivaline etnomádeni birlestikter arasynda 175 etnos ókili qatysatyny kútilgen edi. Olar qazaq tilinde Abaidyń 175 óleńin oqyp, áleýmettik jelide videolar jariialaýy tiis boldy.
Alaida aqynnyń shyǵarmashylyǵyna qyzyǵýshylyq bildirgender sany áldeqaida kóp boldy.
«Nátijesinde QHA-nyń baspasóz qyzmetine 705 beinerolik kelip tústi. Onyń ishinde 521 qatysýshy aqyn óleńderi men aýdarmalaryn qazaq tilinde asqaqtatsa, 127-si basqa tilderde aishyqtaýǵa tyrysty. 126 ónerpaz Abai ánderin shyrqap, qara sózderin naqyshyna keltirip jetkizdi», - dedi QHA-dan.
Barlyq videolar men rolikter Assambleia saity men óńirlik qurylymdarynyń Facebook, Instagram, VKontakte, YouTube, Telegram kanalynda, túrli aqparattyq saittarda jariialandy.
«Buǵan qosymsha, Abai kúninde QHA ǵalymdary men sarapshylary Qazaqstan Prezidenti Q.Toqaevtyń «Abai – rýhani reformator» maqalasynyń mańyzdylyǵyn talqylap, BAQ betterinde 50-den astam pikir jariialady.
Jalpy, Qazaqstan halqy Assambleiasynyń Abai kúnine arnalǵan is-sharalaryna respýblika boiynsha 27 795 etnos ókili qatyssa, onlain konferentsiiaǵa Facebook pen Zoom arqyly 965 sarapshy-ǵalymdar men tarihshylar qatysty», - delingen aqparatta.
