Uly Abaidyń urpaǵy Manatai Baltaqaiuly Parlament Májilisi jáne barlyq deńgeidegi máslihattar depýtattarynyń sailaýyna qatysyp, óz tańdaýyn jasady, dep habarlaidy "Ult aqparat".
Seksenniń seńgirine shyqqan Manatai aqsaqal Abai aýdanynyń Qaraýyl aýylynda dúniege kelgen. 1959 jyly Semei mal dárigerlik institýtyn támamdaǵan. Kóp jyldar boiy ol veterinariia salasynda eńbek etti. 90-shy jyldary Abai aýdany ákiminiń orynbasary, aýdandyq aýyl sharýashylyǵy kásipodaq uiymynyń tóraǵasy boldy. 2000 jyldan beri zeinette.
«Búgin halqymyz úshin aitýly kún. Bul sailaýdan úlken úmit, jaqsylyq kútemiz. Sailaý demokratiia talaptaryna sai ótip jatyr dep esepteimin. Densaýlyq jaǵdaiyma bailanysty sailaý ýchaskesine baryp daýys bere almadym. Sondyqtan úiden daýys berýge ótinish jasaǵan edim. Sóitip ýchaske músheleri úige kelgen soń óz daýysymdy berdim. Elbasymyzdyń jáne Prezident Qasym-Jomart Toqaevtyń bastamasymen memleket tarapynan kóptegen aýqymdy sharalar atqarylýda. Birligimiz nyǵaiyp, halyqtyń jaǵdaiy jaqsara bersin! Sailanatyn depýtattar jurt múddesin qorǵaý jolynda aianbai jumys isteitinine senemin», – dedi aqsaqal.
Aita keteiik, Manatai Baltaqaiuly qazaqtyń tuńǵysh kásibi skripkashysy Aitkesh Tolǵanbaevtyń «Qatal taǵdyr tálkegi» atty ómirbaiandyq kitabyn orys tilinen qazaq tiline aýdarǵan. Oblystyq jáne aýdandyq gazetterde týǵan ólkeniń tarihy men tuǵyry biik tulǵalary týraly talai maqalalar jariialady. Eki ul, úsh qyz tárbielep, olardan alty nemere súiip otyr.
