Abai eńbekterin keminde 10 tilge aýdarýymyz kerek. Bul týraly búgin Abaidyń 175 jyldyq mereitoiyn daiyndaý jáne ótkizý jónindegi memlekettik komissiia otyrysynda QR Premer-Ministriniń orynbasary Berdibek Saparbaev aitty, dep habarlaidy QazAqparat.
«Kelesi jyly bizdiń aldymyzda úlken tarihi, mádeni mańyzy bar sharalar tur. Bizdiń mindetimiz - ony óz deńgeiinde ótkizip, elimizdiń, ultymyzdyń taǵy da bir ret abyroiyn, bedelin dúniejúzine tanytý. Memleket basshysy Qasym-Jomart Toqaevtyń tapsyrmasyna sáikes, Úkimet barlyq memlekettik organdarmen birigip, jalpy respýblikalyq jospardyń jobasyn ázirledi. Qazirgi tańda bul jospar barlyq memlekettik organdarmen kelisildi. Osy josparǵa sáikes, barlyq eldi mekenderde, aýdan, oblys ortalyqtarynda, elordada, respýblikalyq, halyqaralyq deńgeide eń keminde 500-den astam is-shara ótýi kerek. Eń negizi maqsatymyz - osy is-sharalarǵa ásirese jastardy tartý. Oǵan qosymsha mereitoilardy halyqaralyq deńgeide ótkizý úshin biz qazir IýNESKO, TÚRKSOI halyqaralyq uiymdarymen jumys jasap jatyrmyz. Qazir barlyǵymen kelisim bar. Árine, negizgi is-sharalar ShQO-nyń Semei óńirinde ótedi», - dedi B.Saparbaev.
Onyń atap ótýinshe, komissiia músheleri Qaraýyl, Jidebaida bolǵan. Sol jerde mamandarmen bolǵan kezdesýde Jidebaidaǵy mýzeidi, qoryqty, movzoleidi qalpyna keltirý máseleleri talqylanǵan. Aqshoqy, Keńgirbaida, Qunanbai, Abai jerlengen jerlerde qandai qurylymdar, qandai is-sharalar ótýi tiistigi aqylǵa salynǵan.
«Abai Qunanbaiuly shyǵarmalaryn kitap qylyp shyǵarý, derekti filmder túsirý syndy jumystar josparǵa sáikes júrgizilip jatyr. Biz kem degende uly aqynnyń eńbekterin 10 tilge aýdarýymyz kerek. Odan keiingi IýNESKO tóńiregindegi shara Parij qalasynda jospar boiynsha qarasha aiynda ótetin bolady. Bizben qarym-qatynasy jaqsy memleketterde Abaitaný ortalyǵyn ashý jóninen jumys júrgizilip jatyr, Elshiliktermen kelisim bar. Bul oraidaǵy negizgi jumys Nur-Sultandaǵy L.Gýmilev atydaǵy Eýraziia ulttyq ýniversiteti aiasynda júrgiziletin bolady», - dedi vitse-premer.
Sonymen qatar, ol Abaidyń 175 jyldyq mereitoiyna qansha qarajat jumsalatyndyǵyn da aitty.
«Respýblikalyq biýdjetten 3,2 mlrd teńge qarjy bólingen. Qazirgi tańda jergilikti biýdjetten 500 mln teńge bólinip otyr. Qalǵanyn jumys kezinde kóremiz. Buǵan qosa Danial Kenjetaiulymen (ShQO ákimi Ahmetov - avt.) kelistik. Sol óńirden shyqqan qaltaly azamattar, sol óńirde jumys istep jatqan úlken kompaniialar bar. Biz sol demeýshilerdiń de qarjylai múmkindigin paidalanyp, qosymsha qarjy kózderin tabamyz dep josparlap otyrmyz», - dedi ol.
