Jyldyń sońǵy kúnderinde sýyq habar keldi. Abaidyń tikelei urpaǵy, shópshegi - Aidar Baǵfuruly Aqylbaev dúnieden ótti. Sońǵy saparǵa shyǵaryp salýǵa Abaidyń, Qunanbaidyń urpaqtary jinaldy.
Janazasyna mádeniettanýshy Murat Áýezov, Diar Qonaev qatysty. Aqynnyń tuiaǵymen qoshtasý úshin Abai elinen Abai aýdandyq mádeniet bóliminiń basshysy Eldar Orazalin keldi. Ol marqumnyń týystaryna Shyǵys Qazaqstan oblysynyń ákiminiń, Abai aýdanynyń ákiminiń atynan kóńil aitty.
Sýyq habardy estip, Semeiden Almatyǵa Abaidyń «Jidebai-Bórili» memlekettik tarihi-mádeni jáne ádebi-memorialdyq qoryq-murajaiynyń direktory Turdyqul Shańbai keldi.
Aidar Baǵfuruly Aqylbaev Almatynyń Ortalyq ziratynda sheshesi Ǵafýra Razzaqqyzy, aǵasy Báýken Baǵfurulynyń janynda jerlendi.
Qazirgi tańda Abaidan tikelei erkek kindikti eki-aq urpaq qaldy. Olar - Aidardyń uly Daniiar jáne Aidardyń aǵasy Ernesttiń uly - Aidos. Ekeýi de - Abaidyń Dildádan týǵan úlken uly Aqylbaidyń urpaqtary.
Aidos Aqylbaev Ýkrainada turady. Daniiar Aqylbaev muhittanýshy, jasy elýdiń shamasynda, úsh qyzdyń ákesi.
Aidar Aqylbaev 1949 jyly Almatyda týǵan. Baǵfur Álimqululy men Ǵafýra Razzaqqyzynyń úsh ulynyń kenjesi edi. Aǵalary - Ernest, Báýken.
Ákesi Baǵfur kezinde bailardyń urpaǵy, Abaidyń urpaǵy retinde qýdalaýǵa ushyryldy. Anasy Ǵafýra - Razzaq Omarhanuly Áýezovtiń qyzy. Razzaq - Muhtar Áýezovtiń týǵan aǵasy edi. Demek, Aidar Aqylbaev hám Abaidyń urpaǵy, hám Áýezov áýletiniń jieni edi. Baǵfur men úlken uly Ernest Uzynaǵashtyń mańaiynda ornalasqan Myńbaev aýylynyń ziratynda jerlengen.
Aidar Aqylbaev politehnikalyq institýtyn bitirip, kóp jyl Mańǵystaý muńai óndeý salasynda jumys istegen. Bertingi kezde Almatyǵa kóship kelgen.
Jerleý rásiminen keiin, Aidar Aqylbaevqa Quran baǵyshtalǵan. Karantin sharalarynyń sebebinen, asyna kóp adamdy jinaýǵa múmkindik bolmady. Eń jaqyn týystary - Abaidyń tikelei urpaqtary, birge oqyǵan dostary, elden kelgen Turdyqul Shańbai, Eldar Orazalin jinaldy, marqumdy eske aldy.
Turdyqul Shańbai men Eldar Orazalin biyl ótken Abaidyń 175-jyldyǵy týraly da eki aýyz sóz aitty.
Olardyń aitýynsha, aty jaman aýrýdyń indetiniń kesirinen dúrkiregen toi ótpese de, barlyq aimaqtarda, sonyń ishinde Abaidyń elinde kóptegen is-sharalar, onlain-konferentsiialar, kitaptardyń tusaýkeserleri, chellendjter, kontsertter ótken.
Karantin bolǵandyqtan, olardyń kóbisi onlain-rejiminde ótken. Abaidyń memlekettik tarihi-mádeni jáne ádebi-memorialdyq qoryq- murajaiynda remont, rekonstrýktsiia, modernizatsiia ótti.
Murajaida úsh tildi sandyq (elektrondyq) gid baǵdarlamasy ornatyldy. Demek, murajaida úsh tilde eksýrsovodsyz ekskýrsiiany jasaýǵa bolady. Abaidyń murasyn umytpaý, saqtaý, zertteý, dáripteý úshin úkimet kóńilin, qarajatyn bólip júr.
Biyl memleket basshysy Abai eline sapar jasap, aýyldyń aqsaqaldarynan batasyn alǵan. Abaidyń esimi, Abaidyń murasy, Abaidyń eli memleket basshysynyń, úkimettiń nazarynan tys qalmaidy.
Hakim Abai aitqandai, «Ólse óler tabiǵat, adam ólmes». Demek, Abaidyń urpaǵy Aidardyń da esimderi el esinde qalady.
Asqar Daiyrbek
