Prezident teleradiokesheni «Abaidyń qara sózderi» kórkem kinojobasyn túsirýge kiristi.
Bul týraly Prezident teleradiokesheniniń baspasóz qyzmeti habarlady.
15 bólimnen turatyn joba «Ulttyq kinony qoldaý memlekettik ortalyǵynyń» qoldaýymen júzege asady. Túsirilim jumystary Almaty qalasy men Almaty oblysynyń aýmaǵynda 25 qazanǵa deiin júredi.
«Televiziia jobasynyń ár seriiasy tolyqqandy siýjetke qurylady. Siýjetterde bas keiipkerdiń rólin Nurlan Álimjanov, Jan Baijanbaev, Erik Joljaqsynov, Tuńǵyshbai Jamanqulov, Arýjan Jazylbekova, Berik Aitjanov, Aian Ótepbergen siiaqty tanymal qazaqstandyq akterler somdaidy. Joba avtorlary kúrdeli rejisserlik sheshimder arqyly uly oishyldyń ańyzǵa ainalǵan «qara sózderin» jańa qyrynan ashýǵa tyrysady», - dep jazylǵan resmi málimette.
Teleradiokeshenniń bas direktory Raýshan Qajybaevanyń aitýyna qaraǵanda, tereradiokeshen ujymy bul jobaǵa úlken jaýapkershilikpen kirisip otyr.
«Onyń filosofiia paiymdary men danalyǵy ýaqyt ótken saiyn ózekti bola túsken. Oishyldyń «Qara sózderi» qoǵamnyń rýhani-mádeni ómirine baǵdar berip tur», - deidi Raýshan Qajybaeva.
«Aqyry oiladym: oiyma kelgen nárselerdi qaǵazǵa jaza bereiin, aq qaǵaz ben qara siiany ermek qylaiyn, kimde-kim ishinen kerekti sóz tapsa, jazyp alsyn, ia oqysyn, keregi joq dese, óz sózim ózimdiki dedim de, aqyry osyǵan bailadym, endi munan basqa eshbir jumysym joq». Uly aqynnyń sol aitqany ainymai kelip, búgin jurt «qara sózben» jazylǵan rýhani murany áli azyq qylyp keledi.
«Teleradiokeshenniń jańa jobasy Abai álemin túsinýge, qazaq halqynyń uly ulynyń búkil adamzatpen rýhani-filosofiialyq bailanysyn nyǵaitýǵa óz úlesin qosady», - dep jazady keshenniń baspasóz qyzmeti.
