Ǵalym, qoǵam qairatkeri Murat Áýezov Abai Qunanbaiulynyń 175 jyldyq mereitoiyn ótkizýge laiyqty daiyndyqpen kelý kerektigin atap ótti, dep habarlaidy QazAqparat tilshisi.
«Komissiianyń jinalýy der kezinde jasalyp otyr, alda uiymdastyrý sharalaryna ýaqyt bar. Osy oraida jaqsy usynystar jinaqtap, kelesi Abaidyń 175 jyldyǵyn tiisti deńgeide ótkizýge múmkindik bolady. Qazaq halqy úshin Abaidyń mańyzy óte joǵary. Eldiń tutastyǵy, birlikti nyǵaitý, bolashaqqa úmitpen qaraý turǵysynda aǵartýshy óziniń erekshe maǵynalyq túsinigin bergen. Osynyń barlyǵyn uǵynyp, túsinip, 2020 jyldaǵy aýqymdy sharalarǵa laiyqty daiyndyqpen kelýimiz kerek. Óitkeni Abaidyń adamzat tarihynda erekshe orny bar», - dedi ǵalym 2020 jyly Abai Qunanbaiulynyń 175 jyldyq mereitoiyn ótkizý jónindegi memlekettik komissiianyń alǵashqy otyrysynyń aldynda.
Osy oraida ol óskeleń urpaq uly aqynnyń kemeńgerligin uǵynyp, onyń shyǵarmalaryna qurmetpen qaraý kerektigin atap ótti.
Sonymen qatar M. Áýezov Uly Abaidyń 175 jyldyǵyna orai aqyn óleńderin oqý estafetasyna qatysty pikir bildirdi.
«Bul bastama maǵan óte unady. Shynymen de Abai - halyqtan ult jasaityn tulǵa, qiyn kezeńde halqymyzdy biriktirýde úlken ról atqardy», - dedi Murat Áýezov.
Aita keteiik, búgin QR Premer-Ministriniń orynbasary Gúlshara Ábdiqalyqovanyń tóraǵalyǵymen 2020 jyly qazaq halqynyń uly aqyny, aǵartýshysy Abai Qunanbaiulynyń týǵanyna 175 jyldyq mereitoiyn ótkizý jónindegi memlekettik komissiianyń alǵashqy otyrysy ótti.
Jiyn barysynda halyqaralyq, respýblikalyq jáne óńirlik deńgeidegi 500-ge jýyq túrli shara qamtylǵan Abai Qunanbaiulynyń 175 jyldyq mereitoiyna daiyndalý men ótkizý jónindegi jalpyrespýblikalyq jospardyń jobasy qaraldy.
