Qazaqstan Jazýshylar odaǵynyń tóraǵasy Ulyqbek Esdáýlet qazaq halqynyń uly aqyny, aǵartýshysy Abai Qunanbaiulynyń 175 jyldyǵyn merekeleý týraly Jarlyqtyń shyǵýyn qalamgerler qaýymy asyǵa kútkenin aitty, dep habarlaidy QazAqparat tilshisi.
«Abaidyń 175 jyldyǵyn merekeleý Jazýshylar odaǵynyń, jalpy qalam ustaǵan qaýymnyń kútip júrgen qaýlysy bolatyn. Munyń jai qaýly emes, Prezident Jarlyǵy bolyp shyqqanynda úlken mán bar. Qasym-Jomart Toqaevtyń ultymyzdyń uly aqynyn ulaǵattaýda erekshe janashyrlyǵy, tilge, ádebietke degen janashyrlyǵy, Abai Qunanbaevtyń shyǵarmashylyǵyna degen uly qurmeti dep bilý kerek. Bul Jarlyqta ǵylymi-praktikalyq konferentsiialar, Abaidyń shyǵarmashylyǵyna qatysty álem jurtshylyǵynyń qyzyǵýshylyǵyn arttyrý, álemge Abaidyń qadir-qasietin, jumbaǵyn túsindirý siiaqty úlken maqsat tur. Onyń ar jaǵynda buryn ketken olqylyq-kemshilikterdi eskere otyryp, Abai shyǵarmalaryn álemniń jetekshi tilderine aýdarýǵa kóńil bólinýde», - dedi Ulyqbek Esdáýlet.
Jazýshylar odaǵy basshysynyń sózinshe, bul mereitoiǵa Qazaqstan aqyn-jazýshylary da bir kisidei atsalyspaq.
«Árine, bizdegi bútin jazýshy hám aqynnyń atasy - Abai. Sol qalamgerler Abai shyǵarmalaryn jas urpaq boiyna ana sútimen sińirýge, qadir-qasietin túsindirýge bir kisidei atsalysady. Abai oqýlaryn ótkizý, zertteý maqalalaryn jazý, onyń júrip ótken jerlerimen saparlaý, aqynǵa bailanysty shyǵarmalardy sahnalaý, tolyqqandy durys film túsirý jáne taǵy basqa jumystar atqarylyp jatyr. Jańadan poetikalyq qoiylymdardy iske asyrý, búkil balabaqshadan bastap mektepterde Abai óleńderin jattatý, onyń Qara sózderiniń mánin ashyp berý, basqa da kóp is sharalar josparlanyp otyr. Kelesi jyl Túrksoi boiynsha nemese Qazaqstan kóleminde Abai jyly bolyp jariialanatyny anyq», - dedi U.Esdáýlet.
Aita ketý kerek, 30 mamyr kúni QR Prezidenti Qasym-Jomart Toqaev 2020 jyly Abaidyń 175 jyldyq mereitoiyn merekeleý týraly Jarlyqqa qol qoidy.
