Ataqty britandyq aqyndar Shon O’Braien men Djon Bernsaid II dárejeli «Dostyq» ordenimen marapattaldy, dep habarlaidy "Ult aqparat" QR SIM baspasóz qyzmetine silteme jasap.
Marapat Qazaqstan Respýblikasy Prezidenti Qasym-Jomart Toqaevtyń Jarlyǵymen Qazaqstan men Ulybritaniia jáne Soltústik Irlandiia Qurama Koroldigi arasyndaǵy dostyq pen yntymaqtastyqty nyǵaitýǵa qosqan eleýli úlesi úshin, sondai-aq qazaqtyń uly aqyny, filosof jáne aǵartýshysy Abai Qunanbaiulynyń murasyn halyqaralyq arenada ilgeriletýge sińirgen eńbegi úshin berildi.
Eki aqyn Abai shyǵarmalarynyń aǵylshyn tilindegi alǵashqy tolyq jinaǵyn Kembridj ýniversiteti baspasynda daiyndap, basý jobasyna tikelei qatysty. «Ulttyq aýdarma biýrosy» QQ-men (UAB) seriktestikte júzege asyrylǵan joba sheńberinde tanymal britandyq aqyn professor Sh.O’Braien Abai poeziiasynyń aýdarmasyn daiyndady, al qara sózderdi tárjimalaý mindeti belgili shotland jazýshysy jáne aqyny professor Dj.Bernsaidqa júkteldi. Aǵylshyn tilindegi basylym – aty ańyzǵa ainalǵan qazaq aqynynyń shyǵarmalaryn álemniń on tilinde jariialaý jónindegi UAB-nyń aýqymdy jobasynyń bir bóligi.
Ordenderdi tabystaý rásiminde Qazaqstannyń Ulybritaniiadaǵy Elshisi Erlan Ydyrysov Qazaqstan Respýblikasy Táýelsizdiginiń 30 jyldyǵyn merekeleý jylynda joǵary nagradalardy tapsyrýdyń simvoldyq máni bar ekenin atap ótti. Ol sondai-aq professorlar Dj.Bernsaid pen Sh.O’Braiennyń jahandyq aǵylshyntildi aýditoriia arasynda uly Abaidyń murasyn tanymal etýge jáne eki el mádenietterin ózara jaqyndastyrý isine qosqan zor úlesterin atap ótti.
Aita ketken jón, professor Shon O’Braien – britandyq aqyn, synshy, dramatýrg, telejúrgizýshi, jazýshy, redaktor, Niýkasl ýniversitetiniń shyǵarmashylyq jazýdyń burynǵy professory. Onyń marapattaryna T.S.Eliot syilyǵy, «Forward Prize», Somerset Moem syilyǵy jáne basqalar kiredi. «Gardian», «Independent» jáne «Taims» gazetterinde maqalalar jariialaǵan.
Al professor Djon Bernsaid – shotland aqyny jáne jazýshysy, Sent-Endriýs ýniversitetiniń aǵylshyn tili professory. Poeziia men prozanyń birqatar jinaqtaryn jariialaǵan, telehikaialar men radio shoýlarǵa arnalǵan stsenariilerdiń avtory. T.S.Eliot, «Forward Prize», O.Genri syilyqtarynyń jáne basqa da kóptegen marapattardyń laýreaty. Onyń shyǵarmalarynyń aýdarmalary Germaniia, Frantsiia, Ispaniia, Italiia, Túrkiia, Niderland, QHR, Indoneziia, Horvatiia, Braziliia jáne Argentinada basylǵan.
