Abai, Jetisý jáne Ulytaý oblystaryn qurý boiynsha jumys bastaldy. Bul týraly búgin Úkimet otyrysynda QR Ulttyq ekonomika ministri Álibek Qýantyrov aitty, dep habarlaidy QazAqparat.
Onyń aitýynsha, Memleket basshysynyń Joldaýyn iske asyrý jónindegi jalpyulttyq is-sharalar josparynyń «Eldiń ákimshilik-aýmaqtyq qurylysyn jetildirý» baǵytynda 5 is-shara iske asyrylady.
«Búgingi kúni ministrlik Abai, Jetisý jáne Ulytaý oblystaryn qurý boiynsha jumysty bastap ketti. Osy jylǵy 25 naýryzda Premer-Ministrdiń ókimimen atalǵan oblystardy qalyptastyrý úshin komissiia quryldy. Komissiianyń mindeti - jańa óńirlerdi qurý boiynsha júrgizilip jatqan jumys aiasynda memlekettik organdadyń vedomstvoaralyq ózara is-qimylyn qamtamasyz etý», - dedi ol.
Sondai-aq, ministr jaýapty oryndaýshylardy jáne iske asyrý merzimderin kórsete otyryp, «Qazaqstan Respýblikasynyń ákimshilik-aýmaqtyq qurylysynyń keibir máseleleri týraly» Prezident Jarlyǵyn qabyldaý jónindegi jumys algoritmi ázirlengenin aitty.
«Algoritm uiymdastyrýshylyq-daiyndyq jáne jedel is-sharalar tizbesin qamtidy. Algoritm atalǵan oblystar ákimdikteriniń nazaryna jetkizildi. Jalpy alǵanda, Abai, Jetisý jáne Ulytaý oblystaryn qurýdy kózdeitin «Qazaqstan Respýblikasynyń ákimshilik-aýmaqtyq qurylysynyń keibir máseleleri týraly» Prezident Jarlyǵynyń jobasy osy jyly, jaqyn arada Prezident Ákimshiligine engiziledi», - dedi Álibek Qýantyrov.
