Abai synaǵan kóp ádetten áli kúnge aryla almai kelemiz. Bul týraly kórnekti qoǵam qairatkeri, ǵalym Myrzatai Joldasbekov aitty, dep habarlaidy QazAqparat.
«Búgin «Egemen Qazaqstan» basylymyna shyqqan Prezident Qasym-Jomart Toqaevtyń maqalasynda «Abaimen árbir qazaq maqtanýy kerek» dep jazypty. Ol qazaqtyń ǵana emes – dúniejúziniń adamy. Jaqsylyqty, kisilikti, adamgershilikti, óskendi, óngendi, bilimdi, ǵylymdy oilaityn adamnyń bári meniń bilýimshe, Abaimen maqtanady. Osy kúndi tilep júr edik, Prezidentimiz qol qoiyp, Abai kúni jariialandy. Aqynnyń týǵan kúni qutty bolsyn! Toi qutty bolsyn!», – deidi Myrzatai Joldasbekov.
Sonymen qatar qoǵam qairatkeri Abai synaǵan kóp ádetten áli kúnge aryla almai kele jatqandyǵymyzǵa qynjylysyn bildirdi.
«Abai qazaqty jerden alyp, jerge salyp synaǵan. Qazaqty synamaǵan jeri joq. Biraq qazaqty janyndai súigen. Al ókinishtisi, Abai synaǵan kóp ádetten áli kúnge aryla almai kelemiz. Qaita onyń ústine birtalai qasiret, qaiǵy qosyldy. Biz osydan túgel arylýymyz kerek. Abaidy qaita oqý kerek. Abaidy qaita túsinip, uǵynyp oqýymyz kerek. Abaidy jelip júrip oqýǵa bolmaidy. Sonda ǵana biz Abaiǵa tabynamyz. Abaiǵa tabynǵan saiyn elimiz de jaqsara túser edi», – deidi ǵalym.
