Oslo qalasyndaǵy Ádebiet úiinde Abai Qunanbaiulynyń Qara sózderi men tańdamaly poeziiasynyń («Abais dikt og visdomsord») norveg tilindegi aýdarmasynyń tusaýkeseri ótti, dep habarlaidy "Ult aqparat" QR Syrtqy ister ministrliginiń baspasóz qyzmetine silteme jasap.
Bul eńbek norveg tiline aýdarylǵan qazaq klassikalyq ádebietiniń alǵashqy úlgisi bolyp tabylady.
«Qazaqstan Prezidenti Qasym-Jomart Toqaev, Abai murasyna ultymyzdyń birligi men órkendeýine jol ashatyn qundy bailyq retinde júginýge shaqyrady. Biz Abai shyǵarmalarynyń norveg tilinde jaryq kórýin Qazaqstan táýelsizdiginiń 30-jyldyǵyna arnaimyz», – dedi prezentatsiiada Qazaqstannyń Norvegiiadaǵy Elshisi Erkin Ahinjanov.
Abai shyǵarmalaryn norveg tiline tájik-norveg jazýshysy jáne ádebiettanýshy Liýtfiia Boboiorova aýdardy. Kitapty «Sirkel Forlag» baspasy shyǵarǵan, bas redaktory jáne Abai jaily ómirbaiandyq taraý jazǵan norveg ǵalymy jáne baspageri Oshild Kiýlos.
«Abai dara qoǵamdyq synshy boldy, biraq ony birinshi kezekte ekzistentsialdyq máseleler tolǵantty. Abaidyń «Qara sózderi» álemdik ádebi muranyń mańyzdy bóligi bolyp tabylady. Abai shyǵarmalaryn norveg tiline aýdarý – Qazaqstandy Norvegiiaǵa tanystyrýdyń biregei múmkindigi. Buǵan qosa, bul jalpy adamzat tájiribesine uly oishyldyń kózqarastarymen bólisý múmkindigi de bolyp tabylady. Bizdiń baspa bul jobany joǵary baǵalaidy», – dedi O. Kiýlos.
«Abai Qunanbaiulynyń shyǵarmalary eshqashan eskirmeidi, kerisinshe ýaqyt óte kele olarǵa suranys kúsheie beredi. Olar qoǵamnyń kóne, túp-tamyry shabylmaǵan máselelerin naqty sýretteidi, elge baǵyt baǵdar belgileidi. Abaidyń ósiet sózderin ár adam bilim, adamgershilik pen sypaiylyq sabaqtaryn ala alatyn ómir mektebi dep ataýǵa bolady. Abai otbasy negizderine, bala tárbieleýge, tilderdi oqý men ózge mádeniettermen tanysýǵa kóńil bóledi. Sonymen qatar, Abai ádebiet bilgiri bolǵan. Ony shabyttandyrǵandardyń arasynda Firdaýsi, Nizami jáne Navoi siiaqty shyǵys klassikterinen bastap orystyń kórkem sóz sheberleri – Lermontov, Tolstoi men Pýshkin, batystyń aqyndary – Gete men Geine boldy. Ol 120-150 jyl buryn da, búgingi tańda da ózekti, ýaqyttan tys máseleler týraly jazǵan. Norvegiia oqyrmandary Abai shyǵarmalarynan kóptegen paidaly jáne ádemi taǵylymdar ala alatynyna senimdimin», – dep atap ótti L. Boboiorova.
Norvegter álemdegi kitapty eń kóp oqityn halyqtardyń biri ekenin eskerip, aýdarmanyń joǵary sapasyn ǵana emes, sonymen qatar kitaptyń qalyń oqyrmanǵa qol jetimdiligin qamtamasyz etý mańyzdy boldy. Kitap 1500 danamen basylyp, Norvegiia kitaphanalarynda jáne kitap dúkenderinde, sondai-aq tsifrlik platformalarda taratyldy. Aýdio nusqasy da jazylǵan. Basylym qazir Londondaǵy kitap kórmesinde de tanystyrylýda.
