Qaraǵandy oblysy ákiminiń baspasóz qyzmeti saǵat 15.00-degi jaǵdai boiynsha, apat bolǵan «Abai» shahtasynda atqarylyp jatqan jumystar týraly aqparat berdi, dep habarlaidy "Ult aqparat".
Qazirgi ýaqytta qutqarýshylar Qaraǵandy oblysyndaǵy "Abai" shahtasynda oryn alǵan tótenshe jaǵdaidan keiin qazbalardan gaz shyǵarý jumystaryn oryndap jatyr.
– Quramynda 12 adamy bar 2 taý-ken qutqarý bólimshesi metan gazynyń kenetten taraýynan keiin qazbalardy gazsyzdandyrý boiynsha jumystar júrgizýde. Apattyq kenjarda atylǵyn taý-ken massasynyń uzyndyǵy shamamen 20 metrdi quraidy. Shahtanyń basqa jerlerinde eshqandai úiindiler joq, – dep túsindirdi Kásibi áskerilendirilgen apattyq-qutqarý qyzmetteriniń ROSh Qaraǵandy filialynyń direktory Gennadii Silinskii.
Eske salaiyq, 7 qarasha kúni saǵat 08:37-de «ArselorMittal Temirtaý» AQ Kómir departamentiniń «Abai» shahtasynda tótenshe jaǵdai oryn aldy. Apat kezinde shahtada barlyǵy 64 adam bolǵan. 56 adam ózderi jer betine shyqqan. Metan gazy taraǵan 3-K10 kenjarynda segiz adam qalǵan. Altaýy qaza taýyp, ekeýi zardap shekti, olardyń jaǵdaiy aýyr.
Prezident Qasym-Jomart Toqaev qaza tapqan shahterlerdiń jaqyndary men týystaryna kóńil aitty. Sondai-aq zardap shekken azamattardyń tezirek saýyǵyp ketýine tilektestik bildirdi.
