Abai óleńderin oqý estafetasyn jalǵastyrǵan Taraz qalasynyń turǵyny Viktoriia Tregýbovanyń videosy jelide keń tarady, dep habarlaidy Qazaqstan halqy Assambleiasynyń baspasóz qyzmeti.
Memleket basshysy Qasym-Jomart Toqaev mektep oqýshysy Láilim Erlanqyzynan qabyldap, kópshilikke joldaǵan hakim Abaidyń 175 jyldyǵyna arnalǵan aqyn óleńderin oqý estafetasyna Qazaqstan halqy Assambleiasy qyzý qoldaý bildirýde. Assambleia tóraǵasynyń orynbasary Janseiit Túimebaevtyń tapsyrmasymen barlyq óńirdegi etno-mádeni birlestikter bul aktsiiaǵa birden atsalysyp, jumyla jalǵastyryp áketti.
Qatysýshylardyń arasynda Taraz qalasynyń turǵyny Viktoriia Tregýbova da bar. Ol Abai Qunanbaevtyń «Óleń – sózdiń patshasy» óleńin oqyp, kópshilik kózaiymyna ainaldy. Áleýmettik jelide keń taraǵan beinejazbaǵa 1500-ge jýyq repost jasalyp, tamashalaýshylar sany 65 myńnan asty.
Kópshilik Viktoriiaǵa qazaq tiline degen qurmeti úshin erekshe alǵys aityp, zor rizashylyǵyn bildirdi. Olardyń arasynda belgili aqyn, Memlekettik syilyqtyń iegeri Tynyshtyqbek Ábdikákimuly, aqyn, «Platinaly tarlan» syilyǵynyń iegeri Israil Saparbai, kórnekti kúishi, Qazaqstannyń eńbek sińirgen qairatkeri Janǵali Júzbaev, kinorejisser, Qazaqstannyń eńbek sińirgen qairatkeri Satybaldy Narymbetov, dúldil ánshi, Qazaqstannyń eńbek sińirgen qairatkeri, Erlan Rysqali jáne basqa aqyn-jazýshylar men BAQ ókilderi, sondai-aq áleýmettik jeli qoldanýshylary bar.
Aita keteiik, Viktoriia Tregýbova 1998 jyly 1 maýsymda Resei Federatsiiasynyń Ýlianovsk oblysynda dúniege kelgen. 2000 jyly Jambyl oblysy Moiynqum aýdany Ulanbel aýylyna qonys aýdarǵan. M.Áýezov atyndaǵy orta mektepti bitirgen. 2019 jyly M.H.Dýlati atyndaǵy Taraz memlekettik ýniversitetiniń jýrnalistika fakýltetin támamdady.
Qazirgi kezde Taraz qalasynda turady. Qańtar aiynan beri Jambyl oblystyq telearnasynyń «Tuski time» baǵdarlamasynyń tálimger-júrgizýshisi. Jambyl oblystyq Qazaqstan halqy Assambleiasy «Radonej» orystar qoǵamy birlestiginiń múshesi jáne QHA Jańǵyrý joly jastar qozǵalysynyń belsendisi.
«Otbasynda eki aǵaiyndymyz. Ózimnen úsh jas úlken aǵam Vladislav ta qazaq mektebin bitirgen, qazaq tilinde erkin sóileidi. Anam Svetlana Stepanovna – meteorolog, ákem Viacheslav Aleksandrovich - Jambyl oblystyq obaǵa qarsy kúres stantsiiasynyń qyzmetkeri. Naǵashy jurtym – Jambyl oblysynan, anam Ulanbel aýylynda týyp-ósken. Reseige qydyryp baryp, ákemmen tanysyp, ekeýi shańyraq kótergen. Arada 6-7 jyl ótkende anam ákeme týyp-ósken jerin kórsetpek bolyp, eki balasymen tórkinine qydyryp keledi. Ákeme Qazaqstannyń unaǵany sonshalyq, sodan keiin biz Reseige qaita oralmadyq. Aýylda bir ǵana qazaq mektebi bolǵandyqtan úidegiler bizdi sol bilim oshaǵynyń partasyna otyrǵyzdy. Biraq biz qazir memlekettik tildi joǵary deńgeide meńgergenimiz úshin maqtanamyz. Qazaqy ortada tárbielenýime múmkindik jasaǵan áke-shesheme myń alǵys. Ózimdi kópshilikke orystyń qazaq qyzymyn dep tanystyramyn», – deidi Viktoriia Tregýbova.
