Búgin qazaqtyń uly aqyny Abaidyń shyǵarmashylyǵyn dáripteý maqsatynda áleýmettik jelilerde jariialanǵan «IV Abai oqýlary» ádebiet saiysynyń jeńimpazdary anyqtaldy, dep habarlaidy "Ult aqparat" Elbasy kitaphanasyna silteme jasap.
2017 jyldan bastap uiymdastyrylyp kele jatqan atalmysh kitaphananyń bul dástúri qoǵam arasynda Abai murasyn nasihattaýdy, el azamattarynyń oqý mádenietin, ádebi talǵamyn qalyptastyrýdy kózdeidi.
Elbasy kitaphanasynyń direktory, professor Ámirhan Rahymjanovtyń sózinshe, zaman ózgerip, qoǵamdyq sanada kúrt sapyrylystar týǵan saiyn Abaidyń murasy jańa qyrdan jarqyrai ashylyp, qadirin arttyra túspek. Danagói aqynnyń shyǵarmashylyǵyn jańǵyrtýda Elbasy kitaphanasy Abai oqýlaryn uiymdastyrýdy igi dástúrge ainaldyryp qana qoimai, jastardyń oqýǵa qushtarlyǵyn oiatyp, ómirlik kózqarasyn keńeitý maqsatynda biyl «Abai – 175» jobasyn iske qosty. Oishyldyń pálsapalyq murasy arnaiy baǵdarlamamen ázirlengen seminar-treningter men biliktilik dáristeriniń arqaýyna ainaldy. Resmi saittaǵy elektrondy katalogtyń kómegimen mekeme Abai eńbekterine qoljetimdikti iske asyrdy. Oishyldyń týǵan kúnine orai Elbasy kitaphanasy aqynnyń rýhy men shyǵarmashylyǵyna arnap kórmeler men túrli is-sharalardy uiymdastyrýdy da ádetke ainaldyrǵan. 2016 jyly Kitaphana arhiviniń qyzmetkerleri Shyǵys Qazaqstan oblysyndaǵy Jidebai aýylyna saparmen baryp, Semei qalasyndaǵy tarih jáne ólketaný mýzeiinen, qujattaý ortalyǵynan, Abai atyndaǵy ámbebap kitaphanadan aqparat jinap, tyń derektermen qordy tolyqtyrdy.
Búginde Abai oqýlary elimizdiń túrli aimaqtarynan qolǵabys taýyp otyr. Úsh jyldyń ishinde marapattaý rásimine qatysyp úlgergen belgili abaitanýshylar, memleket jáne qoǵam qairatkerleri, ǵylym jáne mádeniet salasynyń syily ókilderi bul sharanyń mańyzdylyǵyn atap kórsetip otyrdy.
Biylǵy baiqaýda qazylar alqasynyń sheshimimen júldeli oryndar men nominatsiialarǵa ie bolǵandar:
I oryn – Nur-Sultan qalasynyń №2 kópbeiindi aýrýhanasy meditsina qyzmetkerleriniń ujymy;
II oryn – Semei qalasyndaǵy fizika-matematika baǵytyndaǵy Nazarbaev Ziiatkerlik mektebiniń 11 synyp oqýshysy Alsana Smailova;
III oryn – Jambyl oblysy, Qordai aýdany, Sortóbe aýylyndaǵy orta mekteptiń 3 synyp oqýshysy Karima Liýshanlo;
«Abai murasyn nasihattaýshy» nominatsiiasy – Almaty oblysy, Eńbekshi qazaq aýdanynyń Esik qalasyndaǵy V.Tereshkova atyndaǵy orta mekteptiń 2 synyp oqýshysy Iýsýf Shirinov. Al «Eń kishkentai úmitker» nominatsiiasynda jeńisti qanjyǵasyna bailaǵan Pavlodar oblysy, Ekibastuz qalasynyń №24 «Ainalaiyn» balabaqshasynyń tárbielenýshisi Jiger Hasen jurttyń kózaiymyna ainaldy.
– Anammen birge Abai atamyzdyń óleńderin súiip oqimyz. Saiystyń uiymdastyrylyp jatqanyn bilgen boida anama qatysatynymdy aityp, uzaq daiyndaldym. Kórermender men qazylar alqasynyń baǵasyna rizashylyǵymdy bildiremin. Saiysqa qatysý óte unady, oǵan keler jyly da úlesimdi qosýǵa ýáde beremin, – deidi Jigerdiń ózi.
– Jigerdiń óleń oqýǵa qushtarlyǵy 3 jasynda oiandy. Abai shyǵarmashylyǵyna qurmeti de erte qalyptasqan. Onyń óleńderin jattaýǵa kelgende, mektep baǵdarlamasyndaǵy qysqa úzindilerdi jaratpai, tolyq nusqasyn jattaǵandy unatady. Óleńniń áni bolsa, shyrqap oryndaǵandy jón sanaidy. Bala túsinigine qiyndaý sózder men uǵymdardyń mánin ylǵi surap oiyna túiip júredi. 7-8 óleńin jattaǵan shaǵynda ol Abaidyń qara sózderine kóshti. Qyzyǵy, syńary Jibekke qaraǵanda, Jigerdiń oilaý qabileti ózgeshe, aǵalyǵy bilinip turady. Ómirge kózqarasy, aqyl-parasaty Abai murasynyń arqasynda qalyptasty desek artyq bolmaidy. Osy tusta óskeleń urpaqty tárbieleý isine úles qosyp jatqan Elbasy kitaphanasyna alǵysymyz sheksiz, – deidi Jiger Hasenniń anasy Merýert Orazalina.
– Abai murasy – qazaq halqynyń asyl qazynasy. Uly oishyldyń qalamynan tamǵan óleń joldaryn tórt jasar balanyń aýzynan estigende kókirekti eriksiz maqtanysh sezimi kernep, boidy óskeleń urpaqqa degen rizashylyq sezimi bileidi. Ádebiet estafetasynda kóptiń kózine túsip, darynymen erekshelengen qatysýshylar jylda marapattalǵanymen, bul saiysta jeńilgender bolmaidy. Sebebi Abai murasyn dáripteýdi mindet tutqan baiqaýdyń ár qatysýshysy sol maqsatty júzege asyryp, mańyzdy istiń oryndalýyna septigin tigizedi. Bul – ortaq jeńis, – deidi Kitaphana direktory Ámirhan Rahymjanov.
«Instagram», «Facebook» áleýmettik jelisine #ElbasyKitaphanasyAbai #AbaidyOqimyz175 #BibliotekaElbasyAbai #chitaemAbaia175 heshtegimen shyqqan 454 posttyń 332-si qazaq tilinde, 122-si orys tilinde jariialanǵan. Dástúrli saiysqa elimizdiń túkpir-túkpirinen, alys-jaqyn shetelden kelip túsetin ótinimniń sany jyldan jylǵa artyp keledi. Tusaýy kesilgen sátten bastap Abai oqýlaryna 1000-nan astam adam qatysqan.
Top jarǵan jeńimpazdarǵa alǵys hattar men syilyqtar tapsyrylmaq.
