Búgin Elbasynyń kitaphanasy «Abai oqýlary» atty áleýmettik jelilerdegi jyl saiynǵy ádebiet saiysynyń nátijelerin qorytyndylady. Elimizdiń túrli aimaqtarynan qolǵabys tapqan joba Memleket basshysynyń «Rýhani jańǵyrý» baǵdarlamasy aiasynda uiymdastyryldy.
Is-sharany Qazaqstan Respýblikasynyń Tuńǵysh Prezidenti – Elbasy kitaphanasy direktorynyń birinshi orynbasary Ámirhan Rahymjanov ashty.
– Memleket basshysy N.Á. Nazarbaev: «Abai sózi – qazaqtyń boitumary. Abai murasy – qazaqtyń eń qasietti qazynasy», - deidi. Qoǵamdyq sanany jańǵyrtý baǵdarlamasyn qoldaý jolynda Elbasy kitaphanasy Abai murasyn jastar arasynda dáripteý jáne olardyń ádebi talǵamyn qalyptastyrý, oqý mádenietin ilgeriletý máselesin myqtap qolǵa aldy. Osy oraida «Abai oqýlary» el azamattarynyń boiyndaǵy ulttyq rýhty kóterip, otansúigishtik qasietter men áleýmettik, azamattyq jaýapkershilikti arttyrýǵa baǵyttaldy, - dedi saiasi ǵylymdardyń doktory, professor Ámirhan Muratbekuly.
Belgili abaitanýshy, Qazaqstan Jazýshylar odaǵynyń múshesi Almahan Muhametqaliqyzynyń sózinshe, Abai shyǵarmashylyǵyn búgingi urpaqqa jan-jaqty nasihattaýdyń mańyzy zor. Bul pikirdi L.N.Gýmilev atyndaǵy Eýraziia ulttyq ýniversitetiniń prorektory, filologiia ǵylymdarynyń doktory, professor Dihan Qamzabekuly da qoldaidy. Onyń aitýynsha, Abaidyń ádebi murasyn keńinen nasihattaý – jastardy ult rýhaniiatyna tárbieleýdiń, ulttyń tili men dilin oiatýdyń birden bir quraly. Is-shara barysynda «EXPO&WOMEN» halyqaralyq uiymynyń atqarýshy direktory Lázzat Asqarova óz baiandamasyn oqydy.
Nátijesinde birinshi oryndy Almaty oblysy Qaskeleń qalasyndaǵy «Aiajan Qarasai» meditsinalyq kolledjiniń túlegi Saltanat Ótebai qanjyǵasyna bailady. II dárejeli diplommen Astana qalasy Qazaq ulttyq óner ýniversitetiniń 2 kýrs stýdenti Raýan Ábdýali marapattaldy. Úshtikti Soltústik Qazaqstan oblysy Aqbulaq aýylyndaǵy Chehov orta mektebiniń 11 synyp oqýshysy Viktoriia Viýshkina men Almaty oblysy Qarasai aýdany Úshqońyr aýylyndaǵy orta mektep-gimnaziiasynyń 8 synyp oqýshysy Baǵila Nietýllaeva túiindedi. Almaty oblysy, Jambyl aýdany Qainazar orta mektebiniń oqýshylary, apaly-sińlili Dariiabai Ásel men Arýjan yntalandyrý syilyǵy men «eń jas qatysýshy» nominatsiiasyn ielendi. Al Nottingem ýniversitetiniń 2 kýrs stýdenti Janbota Dúisebaeva «Abai murasyn álemdik keńistikte dáripteý» nominatsiiasynyń júldegeri atandy. Olarǵa tyń kitap toptamalary men biregei estelik syilyqtary tartý etildi.
Shara barysynda kópshilik nazaryna usynylǵan kitap kórmesinde Kitaphana qory men Elbasynyń jeke kitaphanasyndaǵy biregei basylymdar berildi. Qonaqtar Abai týyndylary alǵashqy aýdarmalarynyń túpnusqalarymen tanysty.
Esterińizge salsaq, «Abai oqýlary» atty jylsaiynǵy ádebiet saiysy ultymyzdyń uly aqyny, dana oishyly, qazaq jazba ádebietiniń negizin qalaýshysy jáne tuńǵysh klassigi Abai Qunanbaiulynyń týǵan kúnine orai ótkizilgen bolatyn. Oǵan qatysqan jumystarmen Instagram, Facebook áleýmettik jelilerinde #bizdińAbai #Abaiádebietsaiysy #ElbasykitaphanasyAbai heshtegteriniń kómegimen tanysýǵa bolady.
