Foto: Abai oblysy ákimdigi
Abai oblysynyń ákimi Nurlan Uranhaev elordadaǵy eseptik brifingte jaqyn týystary men balalarynyń qandai qyzmette jumys istep jatqanyn aityp berdi, - dep habarlaidy Kazinform agenttigi.
Ortalyq kommýnikatsiialar qyzmetiniń kýlýarynda óńir ákimi qyzynyń qymbat brend buiymdary týraly áleýmettik jelide taraǵan beinerolikterge túsinik berdi.
«Meniń qyzym charterlarmen, borttarmen ushpaidy. Onyń júrgizýshi kýáligi de joq, kólik aidamaidy. Máskeý qalasynda turady, 4-kýrsty aiaqtap jatyr. Bir jyldan keiin oqýyn bitirip, sizdiń áriptesińiz bolyp, osynda keledi. Sol kezde ózińiz kórip, óz jaýabyńyzdy alasyz. Meniń qyzym týraly áleýmettik jelide birneshe qyzdyń fotosýreti jariialanǵan, onyń bireýi ǵana meniń qyzymnyń fotosy, qalǵan sýretter kimdiki, ony kim biledi? Ekinshiden, jańalyq jasaimyn dep bireýdiń balasyn ortaǵa salý durys emes dep oilaimyn. Sizderdiń de balalaryńyz bar shyǵar, áli de bolady. Sizdiń balańyz týraly bireý birdeńe aitsa ne isteisiz? Men jaýap berýge daiynmyn. Meniń balalarymnyń siz aitqandai brendi joq, qarapaiym jumys istep jatyr. Eshqandai artyq nárse jasamaidy, araq ishpeidi, temeki tartpaidy. Odan basqa ne qosaiyn», - dep jaýap berdi Nurlan Uranhaev tilshi saýalyna.
Sondai-aq, óńir basshysy memlekettik qyzmetshi retinde jyl saiyn deklaratsiia tapsyratynyn, sonda bári anyq kórsetilgenin atap ótti.
«Eshqandai týysym tender nemese konkýrstarǵa qatyspaidy. Qurylys, material jetkizý nemese basqa da kommertsiiamen eshkim ainalyspaidy. Meniń týǵan apaiym – ýniversitette jumys isteidi, doktorlyq dárejesi bar. Inim Astanadaǵy Eýraziia ulttyq ýniversitetinde jumys isteidi. Úlken ulym memlekettik qyzmette, al kishi ulym – qatardaǵy injener bolyp eńbek etedi», - dep túsindirdi Nurlan Uranhaev.
