Foto: primeminister.kz
Dúisenbi, 12 maýsym Premer-Ministr Álihan Smaiylov Abai oblysyndaǵy iri tabiǵi órtti joiý jáne odan zardap shekken otbasylarǵa qajetti qoldaý sharalaryn kórsetý máseleleri jóninde jedel keńes ótkizdi, dep habarlaidy "Ult aqparat" primeminister.kz saityna silteme jasap.
Keńes tótenshe jaǵdai kezinde qaza tapqandardy bir minýt únsizdikpen eske alýdan bastaldy.
Tótenshe jaǵdailar ministri Syrym Sháriphanovtyń baiandaýynsha, 11 maýsym keshke jel ekpini sekýndyna 18 metrge deiin jetip, órt negizgi oshaqtan ońtústik baǵytta taralǵan. Atap aitqanda, Talitsa aýylyna qarai qalyń tútin júrip, ormannyń tómengi jaǵy órtengen. Eldi mekendi qorǵaý úshin órt sóndirý tehnikasy jedel iske qosylyp, nátijesinde tilsiz jaý aýyzdyqtaldy.
Túnde órtti sóndirý jumystary úsh baǵytta júrdi: ońtústik, batys jáne soltústik-shyǵys. Osynyń arqasynda negizgi oshaq is júzinde qorshaýǵa alyndy. 12 maýsymda tańǵy saǵat 06:00-den bastap órt sóndirý jumystary qaita bastaldy. Qazirgi ýaqytta 1 530 adam, 320 tehnika jáne 14 tikushaq jumyldyrylǵan.
Sonymen qatar Abai oblysynyń ákimi Nurlan Uranhaev qazirgi ahýal jáne qabyldanyp jatqan sharalar jóninde baiandama jasady.
Premer-Ministr TJ sebepterin anyqtaý jáne saldaryn joiý úshin arnaiy Úkimettik komissiia qurylǵanyn, onyń quramyna salalyq ministrlikter men quqyq qorǵaý organdarynyń ókilderi kirgenin atap ótti.
Álihan Smaiylov 10 kún ishinde oqiǵanyń barlyq mán-jaiyn anyqtap, tiisti qorytyndy jasaýdy tapsyrdy.
Oǵan qosa Memleket basshysynyń Abai oblysyndaǵy jedel shtab otyrysynda bergen tapsyrmalaryn oryndaý úshin qaza tapqandardyń otbasylaryna «Qazaqstan halqyna» qorynan 7 mln teńgeden, sondai-aq kámeletke tolmaǵan ár balaǵa 2 million teńgeden tólenetin bolady. Budan bólek, qaza tapqandardyń otbasylaryna jáne zardap shekkenderge qajetti qoldaý sharalaryn kórsetý maqsatynda arnaiy qor quryldy.
Sonymen qatar zardap shekkenderdiń otbasylaryna kelesi qoldaý sharalary kórsetiledi:
- otbasynyń eńbekke jaramsyz barlyq múshelerine (kámeletke tolmaǵan balalarǵa) respýblikalyq biýdjetten asyraýshysynan aiyrylý boiynsha járdemaqy;
- otbasynyń eńbekke jaramsyz barlyq múshelerine Memlekettik áleýmettik saqtandyrý qorynan asyraýshysynan aiyrylý boiynsha birjolǵy áleýmettik tólemaqy;
- qajetti jihazben jabdyqtalǵan turǵyn úimen qamtamasyz etý;
- BJZQ-dan jerleýge arnalǵan birjolǵy tólem.
Sondai-aq nesielerdi esepten shyǵarý úshin qaitys bolǵan adamdar men olardyń otbasylarynyń nesielik júktemesi anyqtalady.
Sonymen qatar 40-tan astam qazaqstandyq JOO órtten zardap shekken otbasylardyń stýdentterine granttar men jataqhanadan oryn berýge daiyn. Oǵan qosa aqyly negizde oqityn stýdentter men magistranttardy grantqa aýystyrý kózdelgen.
Qorytyndylai kele, Premer-Ministr órt oshaqtaryn erte anyqtaý, beinebaqylaý jáne monitoring júielerin engize otyryp, tabiǵatty qorǵaý jáne orman mekemelerin normativtik materialdyq-tehnikalyq jaǵynan jaraqtandyrý qajettigin atap ótti.
