فوتو: primeminister.kz
دٷيسەنبٸ, 12 ماۋسىم پرەمەر-مينيستر ەليحان سمايىلوۆ اباي وبلىسىنداعى ٸرٸ تابيعي ٶرتتٸ جويۋ جەنە ودان زارداپ شەككەن وتباسىلارعا قاجەتتٸ قولداۋ شارالارىن كٶرسەتۋ مەسەلەلەرٸ جٶنٸندە جەدەل كەڭەس ٶتكٸزدٸ, دەپ حابارلايدى "ۇلت اقپارات" primeminister.kz سايتىنا سٸلتەمە جاساپ.
كەڭەس تٶتەنشە جاعداي كەزٸندە قازا تاپقانداردى بٸر مينۋت ٷنسٸزدٸكپەن ەسكە الۋدان باستالدى.
تٶتەنشە جاعدايلار مينيسترٸ سىرىم شەرٸپحانوۆتىڭ بايانداۋىنشا, 11 ماۋسىم كەشكە جەل ەكپٸنٸ سەكۋندىنا 18 مەترگە دەيٸن جەتٸپ, ٶرت نەگٸزگٸ وشاقتان وڭتٷستٸك باعىتتا تارالعان. اتاپ ايتقاندا, تاليتسا اۋىلىنا قاراي قالىڭ تٷتٸن جٷرٸپ, ورماننىڭ تٶمەنگٸ جاعى ٶرتەنگەن. ەلدٸ مەكەندٸ قورعاۋ ٷشٸن ٶرت سٶندٸرۋ تەحنيكاسى جەدەل ٸسكە قوسىلىپ, نەتيجەسٸندە تٸلسٸز جاۋ اۋىزدىقتالدى.
تٷندە ٶرتتٸ سٶندٸرۋ جۇمىستارى ٷش باعىتتا جٷردٸ: وڭتٷستٸك, باتىس جەنە سولتٷستٸك-شىعىس. وسىنىڭ ارقاسىندا نەگٸزگٸ وشاق ٸس جٷزٸندە قورشاۋعا الىندى. 12 ماۋسىمدا تاڭعى ساعات 06:00-دەن باستاپ ٶرت سٶندٸرۋ جۇمىستارى قايتا باستالدى. قازٸرگٸ ۋاقىتتا 1 530 ادام, 320 تەحنيكا جەنە 14 تٸكۇشاق جۇمىلدىرىلعان.
سونىمەن قاتار اباي وبلىسىنىڭ ەكٸمٸ نۇرلان ۇرانحاەۆ قازٸرگٸ احۋال جەنە قابىلدانىپ جاتقان شارالار جٶنٸندە بايانداما جاسادى.
پرەمەر-مينيستر تج سەبەپتەرٸن انىقتاۋ جەنە سالدارىن جويۋ ٷشٸن ارنايى ٷكٸمەتتٸك كوميسسييا قۇرىلعانىن, ونىڭ قۇرامىنا سالالىق مينيسترلٸكتەر مەن قۇقىق قورعاۋ ورگاندارىنىڭ ٶكٸلدەرٸ كٸرگەنٸن اتاپ ٶتتٸ.
ەليحان سمايىلوۆ 10 كٷن ٸشٸندە وقيعانىڭ بارلىق مەن-جايىن انىقتاپ, تيٸستٸ قورىتىندى جاساۋدى تاپسىردى.
وعان قوسا مەملەكەت باسشىسىنىڭ اباي وبلىسىنداعى جەدەل شتاب وتىرىسىندا بەرگەن تاپسىرمالارىن ورىنداۋ ٷشٸن قازا تاپقانداردىڭ وتباسىلارىنا «قازاقستان حالقىنا» قورىنان 7 ملن تەڭگەدەن, سونداي-اق كەمەلەتكە تولماعان ەر بالاعا 2 ميلليون تەڭگەدەن تٶلەنەتٸن بولادى. بۇدان بٶلەك, قازا تاپقانداردىڭ وتباسىلارىنا جەنە زارداپ شەككەندەرگە قاجەتتٸ قولداۋ شارالارىن كٶرسەتۋ ماقساتىندا ارنايى قور قۇرىلدى.
سونىمەن قاتار زارداپ شەككەندەردٸڭ وتباسىلارىنا كەلەسٸ قولداۋ شارالارى كٶرسەتٸلەدٸ:
- وتباسىنىڭ ەڭبەككە جارامسىز بارلىق مٷشەلەرٸنە (كەمەلەتكە تولماعان بالالارعا) رەسپۋبليكالىق بيۋدجەتتەن اسىراۋشىسىنان ايىرىلۋ بويىنشا جەردەماقى;
- وتباسىنىڭ ەڭبەككە جارامسىز بارلىق مٷشەلەرٸنە مەملەكەتتٸك ەلەۋمەتتٸك ساقتاندىرۋ قورىنان اسىراۋشىسىنان ايىرىلۋ بويىنشا بٸرجولعى ەلەۋمەتتٸك تٶلەماقى;
- قاجەتتٸ جيھازبەن جابدىقتالعان تۇرعىن ٷيمەن قامتاماسىز ەتۋ;
- بجزق-دان جەرلەۋگە ارنالعان بٸرجولعى تٶلەم.
سونداي-اق نەسيەلەردٸ ەسەپتەن شىعارۋ ٷشٸن قايتىس بولعان ادامدار مەن ولاردىڭ وتباسىلارىنىڭ نەسيەلٸك جٷكتەمەسٸ انىقتالادى.
سونىمەن قاتار 40-تان استام قازاقستاندىق جوو ٶرتتەن زارداپ شەككەن وتباسىلاردىڭ ستۋدەنتتەرٸنە گرانتتار مەن جاتاقحانادان ورىن بەرۋگە دايىن. وعان قوسا اقىلى نەگٸزدە وقيتىن ستۋدەنتتەر مەن ماگيسترانتتاردى گرانتقا اۋىستىرۋ كٶزدەلگەن.
قورىتىندىلاي كەلە, پرەمەر-مينيستر ٶرت وشاقتارىن ەرتە انىقتاۋ, بەينەباقىلاۋ جەنە مونيتورينگ جٷيەلەرٸن ەنگٸزە وتىرىپ, تابيعاتتى قورعاۋ جەنە ورمان مەكەمەلەرٸن نورماتيۆتٸك ماتەريالدىق-تەحنيكالىق جاعىنان جاراقتاندىرۋ قاجەتتٸگٸن اتاپ ٶتتٸ.
