Abai oblysynda orman órtimen kúreste qaza tapqan órt sóndirýshiler men ormanshylarǵa eskertkish ashyldy. Ashylý saltanatyna oblys ákimi Nurlan Uranhaev, oblystyq máslihat tóraǵasy Qýanysh Súleimenov, qaza tapqan ormanshylardyń týystary, memlekettik organdardyń qyzmetkerleri jáne jergilikti turǵyndar qatysty. Sharada batyrlardyń qurmetine gúl shoqtaryn qoiý rásimi de ótkizildi.
Eskertkishtiń avtory — músinshi Nurbol Qaliev. Granit tuǵyrǵa ornatylǵan segiz metrlik eskertkish tilsiz jaýǵa qarsy turǵan «Semei Ormany» rezervatynyń batyl ormanshylarynyń rýhyna taǵzym ispettes. Qoladan jasalǵan eskertkish qaza tapqandardyń batyldyǵy men óz isterine degen adaldyǵyn beineleitin releftermen bezendirilgen.
Eskertkishtiń ashylýynda sóz alǵan aimaq basshysy Nurlan Uranhaev jerlesterimizdiń erlik dańqy óshpeitindigin erekshe atap ótti.
«Qara ormandy qadirlep, batyldyq pen batyrlyqtyń jarqyn úlgisin kórsetkender urpaq jadynda máńgi saqtalady. Bul tuǵyrtas tabiǵattyń tosyn minezine tótep bergen azamattardyń atyn áigileý úshin arnaiy qoiylyp otyr. Esimderi tarih taqtasyna altyn árippen jazylyp, urpaǵy maqtan eter jerlesterimizge, biz, qashanda basymyzdy iemiz!», - dedi aimaq basshysy Nurlan Uranhaev óz sózinde.
Sharada qaza tapqan ormanshylardyń týystary sóz sóiledi. Solardyń biri Arai Ámirhanova eskertkish batyrlarǵa qurmet ekenin atap ótti.
«Ashylǵan eskertkish beibit kúnniń batyrlaryna kórsetilgen qurmet dep esepteimin. Memleket tarapynan kórsetilgen qoldaýdy sol qaiǵyly kúnnen beri sezinip kelemiz. Biri jarynan, biri ulynan, biri aǵa-baýyrynan aiyrylǵan qaiǵyly jaǵdaidy el bolyp birge ótkerdik. Búgin mine eńseli eskertkish ornatyldy. Alǵash ret bizben kezdeskende Memleket basshysy Qasym-Jomart Kemeluly barlyq kómekti alasyzdar dep aitqan bolatyn. Prezidentimizge qoldaý kórsetip, kómek qolyn sozǵany úshin zor alǵys bildiremin. Barlyq kómekti aldyq, oǵan myń da bir alǵys» - dedi Arai Ámirhanova.
Eskertkish Borodýliha aýdanyndaǵy Kamyshenka ormanshylyǵynyń mańy men respýblikalyq kúre joldyń boiynda ornalasqan. Bul batyldyq pen adaldyqtyń máńgilik simvolyna ainalyp, óz halqynyń qaýipsizdigi men tabiǵatty qorǵaý úshin ózin qurban etkenderdi eske salady.
