© Photo: Qazaqstannyń ekologiia jáne tabiǵi resýrstar ministrligi
Abai oblysynda kóz jumǵan traktorshy Sergei Arhipov orman órtinen qaza bolǵandar sanatyna jatqyzylmaidy. Bul týraly Bas prokýrordyń orynbasary Jandos Ómiráliev málimdedi, dep habarlaidy Sputnik Qazaqstan.
Májilis kýlýarynda jýrnalister "Abai oblysynda máiiti tabylǵan aýyl turǵyny Sergei Arhipov órt qurbandarynyń tizimine kire me?" dep surady.
Ómirálievtiń aitýynsha, marqum orman órtinen qaza bolmaǵan.
"Ol azamat órt alqabynan tys, basqa jerde tabylǵan. Traktory da, denesi de. Ókinishke qarai, qandai sebepten kóz jumsa da, árine, bul óte aýyr. Biraq ol órttiń saldarynan qaza bolmaǵan. Sol sebepti ol azamattardyń (orman órtiniń qurbandary) sanatyna jatqyzylmaidy", - dedi Bas prokýrordyń orynbasary.
Ómiráliev marqumnyń otbasyna qoldaý kórsetý sharalary oblys ákimdiginiń quzyretine jatatyn másele ekenin atap ótti.
"Memleket basshysy órtten zardap shekkenderdiń otbasylaryna jan-jaqty kómek berýdi tapsyrdy. Kómek berý nemese bermeý oblystyq ákimdikke bailanysty. Múmkin kásipkerler de kómekteskisi keletin shyǵar, bul zańǵa qaishy emes", - dedi ol.
Eske salsaq, 13 maýsymda Abai oblysynda úsh kún buryn joǵalyp ketken Besqaraǵai aýdany Dolon aýylynyń turǵyny Sergei Arhipovtyń máiiti tabyldy. Politseiler onyń denesin órt sóndirý ornynan 50 shaqyrym jerde tapqan. Marqumnyń denesinde zorlyq-zombylyq belgileri bolmaǵan.
Sot-meditsinalyq saraptamanyń qorytyndysy 1987 jylǵy er adamnyń júrek jetkiliksizdiginen qaitys bolǵanyn kórsetken.
Aita keteiik, Abai oblysyndaǵy alapat órtten orman sharýashylyǵynyń 14 qyzmetkeri qaza boldy. Olar óz ýchaskesindegi órtti sóndirýge shyqqan.
