Foto: Polisia.kz
Abai oblysynda politseiler ózge oblystyń turǵynynan 100 keliden astam marihýana men 7 keliden astam gashish tárkiledi, dep habarlaidy Ult.kz.
"Qarasora - 2025" jáne "Dármek" jedel-profilaktikalyq is-sharalary aiasynda Abai oblysynyń politseileri Almaty oblysynyń 33 jastaǵy turǵynynyń turǵylyqty jerin tintý barysynda ósimdik tektes jasyl tústi zat salynǵan tórt qap pen untaq tárizdes jasyl tústi zat salynǵan polimerlik paket tapty.
Sot-narkologiialyq saraptama qorytyndysyna sáikes, tárkilengen zattar — jalpy salmaǵy 105 keliden astam keptirilgen marihýana jáne 7 keliden astam gashish ekeni anyqtaldy. Tergeý barysynda kúdikti óz kinásin moiyndap, jabaiy qarasorany ózi jinap, keptirip, keiin satý maqsatynda saqtaǵanyn aitty.
Qazirgi ýaqytta ol ýaqytsha ustaý izoliatoryna qamaldy. Atalǵan derek boiynsha sotqa deiingi tergep-tekserý júrgizilip jatyr.
