Foto: forbes.kz
Abai oblysynda maýsymdyq infektsiialardyń órshýine bailanysty birqatar mektepterde oqytý formaty ýaqytsha onlain túrine aýystyryldy. Bul týraly oblystyq bilim basqarmasynyń baspasóz qyzmeti habarlady.
Málimetke boiynsha, oblystyń bas memlekettik sanitariialyq dárigeriniń 2025 jylǵy 22 tamyzdaǵy №6 qaýlysyna sáikes, synyptaǵy naýqastar sany 30 paiyzdan asqan jaǵdaida sabaqtar qashyqtan júrgiziledi.
Qazirgi tańda óńirde 10 073 oqýshy onlain oqýǵa kóshirilgen. Onyń ishinde 9 870 bala – Semei qalasynyń oqýshylary. Sonymen qatar Aqsýat, Aiagóz jáne Besqaraǵai aýdandarynda 203 oqýshy mektepke barmai, qashyqtan bilim alyp jatyr.
Búginde oblystaǵy 304 mektepte 99 391 oqýshy oqidy. Onyń 246-sy dástúrli formatta jumys istep tur, al 58 mektepte jekelegen synyptar ýaqytsha onlain oqytylýda.
Vedomstvo mamandary bul sharalar maýsymdyq infektsiialardyń taralý qaýpin tómendetýge baǵyttalǵanyn atap ótti. Dárigerler ata-analardy balalardyń jaǵdaiyn jiti baqylap, syrqat belgileri baiqalǵan jaǵdaida dárigerge júginýge shaqyrdy.
