Foto: Abai oblysynyń Politsiia departamenti
Abai oblysy, Besqaraǵai aýdanyna qarasty Jetijar aýyldyq okrýginde ornalasqan Lesnoi aýyly halqy bir aýyzdan alkogol ónimderin tutynýdan tolyqtai bas tartyp, salaýatty ómir saltyn basty qundylyq retinde tańdaǵan, dep habarlaidy Ult.kz.
Ftalǵan bastama Jetijar aýyldyq okrýgine jaýapty Besqaraǵai aýdany politsiia bóliminiń Qoǵamdyq qaýipsizdik bólimshesiniń ýchaskelik politsiia inspektory, politsiia maiory Murat Shakimuratovtyń usynysymen kóterilip, aýyl aqsaqaldary, qoǵamdyq keńes músheleri jáne belsendi turǵyndardyń tolyq qoldaýymen júzege asyryldy.
Qazirgi tańda 170 turǵyny, 34 aýlasy bar shaǵyn ǵana Lesnoi aýylynyń bul qadamy qoǵamda oń baǵasyn alyp otyr.
Aýyl aqsaqaldarynyń aitýynsha:
«Alkogolden bas tartý – bul tek ishimdikten tyiylý emes, bul – bolashaq urpaqtyń amandyǵy men aýyldyń berekesi úshin jasalǵan ortaq sheshim. Biz birligimizdi saqtap, tártip pen tatýlyqty tańdadyq», – deidi aýyldyń qadirli qariialary.
Abai oblysynyń Politsiia departamentiniń habarlaýynsha alkogol ónimderin tutynýdan bas tartý aýyldaǵy qoǵamdyq jaǵdaiǵa oń yqpal etti. Turǵyndarmen ózara is-qimyl júielendirildi. Balalar men jastardyń tárbiesine erekshe kóńil bólinip, olardyń bos ýaqytyn tiimdi uiymdastyrý baǵytynda júieli jumystar júrgizilýde.
Jastar sporttyq jarystarǵa, mádeni-kópshilik is-sharalarǵa belsendi qatysyp, aýyldyń qoǵamdyq ómirine óz úlesterin qosýda. Sporttyq alańdar men mádeni kezdesýler jastardy jaman ádetterden alshaqtatyp, olardyń boiynda jaýapkershilik pen otansúigishtik qasietterdi qalyptastyrýǵa yqpal etýde.
Óz kezeginde ýchaskelik politsiia inspektory politsiia maiory Murat Shakimuratov:
«Lesnoi aýylynyń turǵyndary kórsetken bul birlik pen sanaly tańdaý – quqyq buzýshylyqtyń aldyn alýdaǵy eń tiimdi jol. Halyq pen politsiia arasyndaǵy ózara senim men yntymaqtastyqtyń arqasynda ǵana osyndai nátijege qol jetkizip otyrmyz. Bul bastama ózge aýyldarǵa da úlgi bolady dep senemin», – dep atap ótti.
Lesnoi aýylynyń turǵyndary da óz pikirlerin bildirip:
«Biz tynysh, berekeli aýylda ómir súrgimiz keledi. Balalarymyzdyń bolashaǵy jarqyn bolýy úshin salaýatty ómir saltyn tańdadyq. Politsiia qyzmetkerlerimen birlese jumys isteý bizge senimdilik beredi», – deidi aýyl turǵyndary.
Lesnoi aýylynyń alkogolden bas tartý jónindegi bul bastamasy – qoǵamdaǵy turaqtylyqty, tártipti jáne rýhani qundylyqtardy nyǵaitýdyń jarqyn kórinisi.
