Abai oblysynda quramynda altyn bar kendi zańsyz óndirý toqtatylyp, qylmystyq toptyń músheleri ustaldy. Olardyń arasynda sheteldikter de bar, – dep habarlaidy "Ult aqparat" Polisia.kz portalyna silteme jasap.
IIM Uiymdasqan qylmysqa qarsy kúres departamentiniń bólimsheleri Abai oblysy Jarma aýdanyndaǵy "Edilbai" ýchaskesinde quramynda altyn bar materialdy zańsyz óndirýmen, óńdeýmen, jer qoinaýyn óz betinshe paidalanýmen jáne zańsyz kóshi-qondy uiymdastyrýmen ainalysqan qylmystyq topty ustady. Bul fakt Qylmystyq kodekstiń 287-baby 3-bóligi boiynsha tirkelgen.
"Ótkizilgen is-sharalar barysynda Jańǵyztóbe kentinen 30 shaqyrym jerde quramynda altyn bar kendi qaita óńdeý boiynsha 2 zańsyz tseh taratyldy. 13 "altyn izdeýshi" ustaldy, onyń ishinde 7-ýi sheteldik.
Izdeý is-sharalaryn júrgizý kezinde quramynda 100 tonna altyn bar ken, sondai-aq 2 kilogramnan astam jarylǵysh (ammonit) jáne ýly (synap) zattar, sondai-aq óndirýge qajetti jabdyqtar tabylyp, tárkilendi" - delingen habarlamada.
Quramynda altyny bar materialdy óndirý jáne qaita óńdeý boiynsha "izdeýshiler brigadasyn" jinaǵan, zańsyz tsehtardyń iesi qylmystyq toptyń uiymdastyrýshysy da anyqtalǵan.
