Memleket basshysy Qasym-Jomart Toqaev «Abai jáne XXI ǵasyrdaǵy Qazaqstan» atty maqalasynda qazaqtyń bas aqynyn «álemdik mádeniettiń tulǵasy» dep baǵa bergen bolatyn. «Ǵulama Abai – qazaq topyraǵynan shyqqan álemdik deńgeidegi kemeńger. Ol kúlli adamzat balasyna aqyl-oidyń jemisin syilaidy», – deýi uly oishyldy jaqsy tanyp, joǵary baǵalaǵanynyń kórinisi. El Prezidentiniń sózin iske jalǵaǵan Ulttyq akademiialyq kitaphana Mádeniet jáne sport, Syrtqy ister ministrligi jáne birneshe shet elderdiń elshilikterimen bailanysa otyryp «Abai» mádeni-aqparattyq ortalyqtaryn ózge memleketterde ashý bastaý aldy. Sonyń biri – Chehiia astanasy Praga qalasyndaǵy Klementiným Ulttyq kitaphanasyndaǵy ortalyq. Qazaqstan Ulttyq akademiialyq kitaphananyń basshysy Úmithan Dáýrenbekqyzynyń bastamasymen ótken sharaǵa eki elden laýazymdy tulǵalar qatysyp, jiynnyń joǵary deńgeide ótýine atsalysty.
«Abai» mádeni-aqparattyń ortalyǵynyń shymyldyǵyn elshi Marat Tájin ashty. Alǵysózinde uly oishyldyń taǵylymdy muralaryn álem nazaryna usynýdyń mańyzymen bólisti. Sóz arasynda Chehiia ulttyq kitaphanasyna alǵys bildirip, eki el arasyndaǵy mádeni qarym-qatynastyń dami túsetindigin tilge tiek etti. Sóz kezegin alǵan Chehiia Respýblikasy Parlamentiniń depýtaty Stanislav Berkývich qazaq jurtyn jaqyn tanýǵa úlken jol ashylyp otyrǵanyn erekshe ásermen jetkizdi. Abai Qunanbaiulynyń qara sózderin cheh tiline aýdaryp jatqan Vladislav Kýichek te sol aradan tabyldy. Ult maqtanyshyn ózge tilde sóiletken aýdarmashyǵa iltipatpen izet kórsetip, shapan japqan delgatsiia músheleri el atynyn rizashylyǵyn bildirdi.
Saltannatty ashylý sharasy «Álem tanyǵan Abai» atty dóńgelek ústelge ulasty. Qazaqstan Jazýshylar odaǵynyń tóraǵasy Ulyqbek Esdáýlet, elshi Marat Muhanbektqazyuly, abaitanýshy Tursyn Jurtbai qatysýshylarǵa baiandama oqydy.
Roza Kabieva,
Almaty qalasy Ortalyqtandyrylǵan kitaphana
júiesi direktory
