Jańǵyrý – ótkennen qol úzip, tek jańa qundylyqtarǵa jol ashý degen sóz emes. Shyn máninde, bul – ulttyq muralarymyzdy búgingi oń úrdistermen úilestire damytýdy kózdeitin qubylys. Bul rette, biz Abaidy ainalyp óte almaimyz. Sebebi, uly oishyl osydan bir ǵasyrdan astam ýaqyt buryn ultty jańǵyrýǵa, jańarýǵa, jańa ómirge beiim bolýǵa shaqyrǵan.
Bul týraly Memleket basshysynyń «Abai jáne HHI ǵasyrdaǵy Qazaqstan» atty maqalasynda aitylǵan.
«Abaidyń shyǵarmalaryna zer salsaq, onyń únemi eldiń alǵa jyljýyna, ósip-órkendeýine shyn nietimen tileýles bolǵanyn, osy ideiany barynsha dáriptegenin baiqaimyz. Al, ilgerileýdiń negizi bilim men ǵylymda ekenin anyq bilemiz. Abai qazaqtyń damylsyz oqyp-úirengenin bar jan-tánimen qalady. «Ǵylym tappai maqtanba» dep, bilimdi igermeiinshe, biikterdiń baǵyna qoimaitynyn aitty. Ol «Biz ǵylymdy satyp mal izdemek emespiz», – dep tujyrymdap, kerisinshe, el dáýletti bolýy úshin ǵylymdy igerý kerektigine nazar aýdardy. Uly Abaidyń «Paida oilama, ar oila, Talap qyl artyq bilýge» degen ónegeli ósietin de osy turǵydan uǵynýymyz qajet. Bul tujyrymdar qazir de asa ózekti. Tipti burynǵydan da zor mańyzǵa ie bolyp otyr. Sebebi, HHI ǵasyrdaǵy ǵylymnyń maqsaty biikke umtylý, alysqa qulash sermeý ekenin kórip otyrmyz» dei kele, Memleket basshysy maqalasynda «bizdiń mindetimiz – osy ilgeri kóshke ilesip qana qoimai, aldyńǵy qatardan oryn alý» ekenin atap ótken.
Sondai-aq, osy maqsatqa jetýdiń joldaryn aiqyn kórsetken: «Ol úshin, eń aldymen, bilim berý salasyn zamanǵa sai damytýymyz kerek. Sol maqsatta aýqymdy jumystar atqarylǵanymen, otandyq bilim berý isinde áli de olqy tustar bar. Ony jetildirý joldaryn sailaý aldyndaǵy baǵdarlamamda jáne ótken jylǵy tamyz konferentsiiasynda naqty atap kórsettim.
«Pedagog mártebesi týraly» zańnyń qabyldanýy – osy baǵyttaǵy igi bastamalardyń biri. Bul – sapaly bilim berý isin jetildirýge arnalǵan qadam. Jalpy, kez-kelgen qoǵamda ustazdyń orny bólek. Muǵalimder bilimdi ári sanaly urpaq tárbieleý isinde asa mańyzdy ról atqarady. Ustazǵa qurmet kórsetip, qadirleý – bárimizdiń mindetimiz. Sondyqtan memleket muǵalim mamandyǵynyń mártebesin kóterip, alańsyz jumys isteýine jaǵdai jasaýy kerek».
