Foto: turkystan.kz, Artem Chýrsinov
28 qarashada QR Ulttyq kitaphanasynda «Abai» baspasynan jaryq kórgen 35 kitaptyń tusaýkeseri ótedi, - dep habarlaidy "Ult aqparat".
Baspa qazaq ádebietiniń klassik aqyn-jazýshylarynyń shyǵarmalarynan biregei seriia jasaqtaǵan. Bul seriia qazaqtyń bas aqyny, hákim Abaidan bastalyp, Dýlat Babataiuly, Shákárim, Máshhúr Júsip Kópeiuly, Muhtar Áýezov, Alashorda qairatkerleri, Keńes Odaǵy zamanynyń áigili qalamgerleri, táýelsiz Qazaqstannyń kórnekti jazýshylary men belgili jas avtorlardyń shyǵarmalaryn qamtidy.
Qazaq ádebietiniń negizin qalaýshy Abai hákimnen bastalyp, ár kezeńniń klassik qalamgerleriniń shyǵarmalarymen jalǵasyn tapqan kitaptardyń ishinde ońailyqpen qolǵa túse bermeitin, izdegenge taptyrmas akademiialyq zertteý eńbekteri de bar.
«Abai» baspasynan shyqqan 35 kitap álemdik suranysqa sai, zamanaýi úlgide, minimalizm dizainda jasalǵan. Jinaqtardyń birazy burynnan qalyptasqan forma men túster galereiasyn, tipti mazmuny men taqyrybyn da buzyp-jaryp, jańa tartymdylyǵymen oqyrmanǵa jol tartpaq.
Atap aitsaq, qazaqtyń bas aqyny, aǵartýshy, qazaq jazba ádebietiniń, qazaq ádebi tiliniń negizin qalaýshy, filosof, kompozitor, aýdarmashy, saiasi qairatker, reformator Abai Qunanbaiulynyń artynda qalǵan rýhani murasy «Júrektiń kózi ashylsa...», qazaqtyń áigili áýliesi, aqyn, aǵartýshy, filosof Máshhúr Júsip Kópeiulynyń ádebi murasy «Hal-ahýal», uly aqyn Shákárim Qudaiberdiulynyń eńbekteri «Nasihat», sóz zergeri Dýlat Babataiulynyń shyǵarmalary «Sandyqtas» degen ataýmen oqyrmanǵa usynylmaq.
Ultymyzdyń dara tulǵasy Mirjaqyp Dýlatulynyń óleńderi «Alashqa», sheber jazýshy Júsipbek Aimaýytulynyń týyndylary «Rábiǵa», qazaq poeziiasynyń Qulageri Iliias Jansúgirovtiń shyǵarmalary «Saǵanaq» ataýymen basyldy.
Qarymdy qalamger Beiimbet Mailinniń ádebi murasy «Qandy tuman», klassik jazýshy Sáken Seifýllinniń shyǵarmalary «Aqqýdyń airylýy» deitin ataýmen jaryq kórdi. Qazaqtyń uly aqyny, Alash qozǵalysynyń qairatkeri, poeziiasy qazaq ádebietine ǵana emes, túrki tektes halyqtar ádebietine de úlken yqpal etken bes arystyń biri Maǵjan Jumabaevtyń ómirsheń, rýhty óleńderi «Turan», uly jazýshy M.Áýezovtyń shyǵarmalary toptasqan kitaptar «Kókserek» jáne «Qily zaman» ataýymen oqyrman qaýymǵa jol tartpaq.
Qazaqtyń aqiyǵy, ǵasyr aqyny Muqaǵali Maqataevtyń jinaǵy «Otan», uly aqyn Tólegen Aibergenovtyń kez kelgen jyryndaǵy saǵynyshy «Saǵynysh» degen atpen jaryq kórdi. Sonymen qatar, «Abai» baspasynan jaryq kórgen kitaptar tiziminde qazaqtyń klassik aqyndary Jumeken Nájimedenov, Tumanbai Moldaǵaliev, Syrbai Máýlenovtiń jyr jinaqtarynyń, kórnekti jazýshy Smaǵul Elýbaidyń «Balalyq shaq baiany» atty kitaby da airyqsha mańyzǵa ie.
Qazaqtyń asa kórnekti aqyny, qazaq poeziiasyna ózgeshe lep ákelgen Jarasqan Ábdirash, Temirhan Medetbek, Tynyshtyqbek Ábdikákimuly, Svetqali Nurjan, Tabyldy Dosymov týyndylary da osy jinaqtardyń salmaǵyn arttyryp tur. Atalmysh kitaptar tizbegi QR Memlekettik syilyǵynyń iegeri Oljas Súleimenov, Muhtar Shahanov bastaǵan býyn Israil Saparbai, Nesipbek Aituly, Kúlásh Ahmetova, Sabyr Adai, Gúlnar Salyqbai, Qalqaman Sarin, Tanagóz Tolqynqyzy, Erlan Júnis esimdi qalamgerlerdiń týyndylarymen jalǵasa beredi. Solardyń ishinde búgingi kúnniń betsellerine ainalǵan Ularbek Nurǵalymulynyń «Daiaǵashy» kitaby men Aqberen Elgezektiń «Bolmaǵan balalyq shaq» týyndysy múlde bólek dizainda, jańasha formatta oqyrmanǵa usynylmaq.
«Abai» baspasynan jaryq kórgen jańa kitaptar oqyrman talǵamynan shyǵyp, kitapsúier qaýymdy qýantady dep senemiz.
Tusaýkeser rásimi 28 qarashada saǵat 11:00-de QR Ulttyq kitaphanasy N. Dáýletova atyndaǵy zalda ótedi.
