Foto: baribar.kz
15 qarasha kúni, saǵat 15.00-de Almaty qalasynda ornalasqan «Qazaqstan» qonaqúiiniń «Altyn Emel» zalynda «Abai» baspasynan 2024 jyly jaryq kórgen 155 kitaptyń tusaýkeseri ótedi.
Byltyr, 2023 jyly «Abai» baspasynan shyqqan 35 kitaptyń tusaýkeseri ótken kezde baspa ujymy «aldaǵy 2024 jyly qazaqtyń kórkem ádebiet týyndylaryn 100 tomdyqqa jetkizemiz» degen ýáde bergen edi. Biyl baspa sol ýádesin artyǵymen oryndap otyr. Aǵymdaǵy jyly «Abai» baspasynan júz elýden astam kitap jaryq kórip, oqyrmanǵa jol tartty.
Baspada qazaq ádebietiniń klassik aqyn-jazýshylarynyń shyǵarmalarynan jasaqtalǵan biregei týyndylarmen qatar balalar men jasóspirimderge arnalǵan tyń shyǵarmalar da jaryq kórgen.
Kórkem ádebietten bólek baspanyń qorjyny biyl qundy dini-rýhani baǵyttaǵy, tarih salasy boiynsha qyzyqty kitaptar men aýyz ádebietiniń jaýharlarymen de tolyqty. Olar: «Uly tarih jáne Uly áýlieler», «Uly dala aqiqaty», «Taraz – órkenietter órimderiniń kýágeri», «Qarahan baba men Aisha bibi», Altybarmaq babamyzdyń «Muhammedtiń paiǵambarlyq dálelderi», «Turmys salt jyrlary», «Batyrlyq jyr dastandar», «Liro-epostyq jyrlar», «Turmys salt ertegileri», «Ańyz-áńgimeler», «Qiial-ǵajaiyp ertegiler», «Aýyz ádebietiniń shaǵyn túrleri», «Haiýanattar týraly ertegiler» jáne taǵy basqalar.
«Abai» baspasynan jaryq kórgen kórkem ádebiet kitaptarynyń kóshin Dýlat Babataiuly, Hákim Abai, áýlie Shákárim, áýlie Máshhúr Júsip Kópeiuly bastap, Muhtar Áýezov, Alashorda qairatkerleriniń shyǵarmalary men Keńes Odaǵy zamanynyń áigili qalamgerleri jalǵastyryp otyr. Sonymen qatar, «Abai» baspasy oqyrmannyń sóresin Táýelsiz Qazaqstannyń kórnekti jazýshylary men belgili jas avtorlardyń shyǵarmalarymen tolyqtyryp otyr.
«Abai» baspasynan shyqqan 155 kitap álemdik suranysqa sai, zamanaýi úlgide, boiaýy bai, biregei dizainda jasaqtalyp, ózine tán tartymdylyǵymen erekshelenedi.
Odan bólek biylǵy tusaýkeserde «Abai» baspasy qazaq avtorlary men otandyq baspalar úshin taǵy bir tosyn syi jasady.
Ol – elektrondyq jáne aýdiokitaptar jariialanatyn biregei internet platforma. «Bookstagram» dep atalatyn mobildik qosymsha arqyly «Abai» baspasy endi qalyń oqyrmanǵa qazaq kitaptaryn qoljetimdi etip bergisi keledi. Bul mobildik qosymshany damytyp, eldiń súiikti onlain kitaphanasyna ainaldyrý arqyly, baspa qazirgi tańda avtorlyq quqyqtardy óreskel buzyp, qazaq kitaptaryn ártúrli áleýmettik jeliler arqyly jónsiz taratyp jatqan pirattyq qosymshalarǵa tosqaýyl qoimaq.
«Abai» baspasynyń ujymy bul elektrondy kitaptar platformasyn «Aziianyń Amazony» deńgeiine kóteremiz dep maqsat qoiyp otyr. Iaǵni, áýeli platformada qazaq kitaptaryn jariialap, testileýden ótkizip, aldaǵy jyldary «Túrkistan aimaǵy» dep atalatyn halyqaralyq óńirdiń naryǵyna shyǵýdy kózdeýde. Bul platforma arqyly kúlli túrkitildes avtorlarynyń basyn biriktirip, bolashaqta internet keńistiginde túrkitildes ádebi, ǵylymi kitaptardyń ortaq álemin qalyptastyrmaq.
Aita ketý kerek, «Abai» baspasy shyǵarǵan barlyq kitaptardy óziniń qarjysyna shyǵaryp, olardy naryqqa shyǵaryp satyp, avtorlarǵa qomaqty qalamaqy tóleitin jaǵdaiǵa da jetti. Biyldyń ózinde kózi tiri 50-den astam avtor men qaitys bolǵan avtorlardyń muragerleri «Abai» baspasynan ártúrli somadaǵy qalamaqy aldy.
«Abai» baspasy kele jatqan 2025 jyly kitap assortimentin kóbeitip, qoǵamdy kitap oqýǵa shaqyratyn birqatar qyzyqty jobalardy usynbaq.
«Abai» baspasynan biyl jaryq kórgen jańa kitaptar qalyń oqyrman talǵamynan shyǵyp, kitapsúier qaýymnyń kóńilinen shyǵady dep senemiz.
Qurmetpen,
«Abai» baspasynyń ujymy
