El rýhaniiaty úshin airyqsha Abai kúnine orai búgin saǵat 21:00-de Qazaqkontserttiń YouTube arnasynda «Abai armany» atty kontserttiń onlain kórsetilimi ótedi, dep habarlaidy "Ult aqparat".
Qazaqkontsert baspasóz qyzmetiniń málimetinshe, onlain kontsertte belgili ánshiler, Qazaqstannyń eńbek sińirgen qairatkerleri Bibigúl Januzaq, Azamat Jyltyrkózov, Medet Shotabaev, Erlan Rysqali, Ardaq Balajanova jáne halyqaralyq baiqaýlardyń laýreattary Asqar Muqiiat, Aiaýlym Qamajan óner kórsetedi. Onlain formatta ótetin merekelik kontsertte Abaidyń ánderi men onyń óleńderine jazylǵan ánder oryndalady.
«Ult rýhaniiatynyń temirqazyǵyna ainalǵan Abaidyń 175 jyldyǵy aiasynda «Abai kúni» degen ataýly datanyń belgilenýi biz úshin qýanyshty jańalyq boldy. Uly Abaidyń bai mýzykalyq murasynda ulttyq ónege men mol taǵylym jatyr. Sondai-aq poetikalyq jáne kompozitorlyq týyndylarymen qazaq mýzykasyna jańa lep ákelgen Abaidyń án murasy erekshe sulýlyǵymen, kórkemdik bailyǵymen, áýezdiligimen qundy. Abaidyń shyǵarmashylyǵyna ǵana tán osy Qazaqkontsert solisteri usynatyn jańa kontserttik baǵdarlama kórinis tabady», - dedi Qazaqkontsert basshysy Jeńis Seidýllauly.
