Londonda Abai ánderiniń tuńǵysh jinaǵynyń onlain-tusaýkeseri ótti. Kitapty uly qazaq aqyny jáne filosofynyń 175 jyldyǵyna orai Ulttyq aýdarma biýrosynyń qoldaýymen Qazaqstannyń Ulybritaniiadaǵy elshiligi basyp shyǵarǵan. Joba avtorlary ádebi shyǵarmashylyqpen qatar, bai mýzykalyq mura qaldyrǵan Abaidy búkil álemge jańa qyrynan tanytý ideiasyn ustanǵan.
«Abaidyń poeziiasy, filosofiialyq jáne mádeni eńbekteri halyqaralyq deńgeide tanymal. Biraq onyń mýzykalyq murasy týraly biri bilse, biri bile bermeidi. Sondyqtan osyndai kitap shyǵarýǵa bekindik. Ishinde Abaidyń eń tanymal ánderi jinaqtalǵan. Basylymnyń basty ereksheligi onyń QR-kodtary bar. Solar arqyly bizdiń sheteldik dostarymyz veb-saittarǵa siltemeler taýyp, qazaq mýzykanttarynyń oryndaýyndaǵy Abai ánderin tyńdai alatyn bolady», - dedi kitaptyń tusaýkeserinde Qazaqstannyń Ulybritaniiadaǵy elshisi Erlan Ydyrysov.
Saltanatty sharaǵa orai Abai ánderinen quralǵan onlain-kontsert ótti. Bastapqyda uiymdastyrýshylar is-sharany kontserttik zalda ótkizýdi josparlaǵan bolatyn. Osylaisha britaniialyq kórermenge qazaq mýzykasynyń sulýlyǵyn tanytýdy maqsat etken. Biraq pandemiia aiaqqa tusaý boldy.
Jańa britaniialyq pop-sensatsiia, ánshi ári avtor Smaili (Smilee) «Kózimniń qarasy» ánin aǵylshyn tilinde oryndap, tyńdarmandy tań-tamasha etti. Niýkasl qalasynan kelgen jas ánshi, aqyn jáne kompozitor Annabel Pattinson bolsa, «Jelsiz túnde jaryq ai» ánin Shekspir tilinde naqyshyna keltirip shyrqady. Qazaqstandyq óner qairatkerleri jáne jas oryndaýshylar Aiman Musaqojaeva, Erlan Rysqali, Erjan Maksim jáne basqalary simfoniialyq orkestrdiń, dombyranyń jáne fortepiianonyń súiemeldeýimen júrek terber Abaidyń ánderinen shashý shashty.
Shyǵarmalardy aǵylshyn tilinde jan bitirýge áigili shotland aqyny, professor Djon Bernsaid atsalysty. Ol ádebi aýdarmalary arqyly túpnusqaǵa barynsha jaqyn bolýǵa tyrysty. Qazaqstandyq tarap Bernsaidty sózbe-sóz tárjimamen qamtamasyz etip otyrdy. «Óte qiyn boldy. Biraq talap údesinen shyǵýǵa tyrystyq. Óitkeni bul jobaǵa óz basym qatty qyzyqtym. Abai óleńderiniń ritmikasyn joǵaltpai, dálme-dál aýdarý basty talap boldy. Sonymen qatar uiqas jaǵyn da umytpaý kerek boldy. Mundai óleńder aýdarylǵanda, ádette, bul strategiia qoldanylmaidy», dedi Djon Bernsaid.
Jinaqtyń ishinde 3 kúi jáne 23 án bar. Sonymen qatar Abai ánderiniń mátinderi men partitýralary qosa tirkelgen. Alǵashqy tirajy - 1500 dana, biraq ony internetten de tabýǵa bolady. Kitap mýzykalyq bilim berý oryndary men Qazaqstannyń Ulybritaniiadaǵy dostary arasynda taratylmaq.
