Abaidyń 175 jyldyǵyna orai aqynnyń músini 10 tamyz kúni M.Kataev atyndaǵy oqýshylar saraiynyń janynan oryn alady, – dep habarlaidy pavlodarnews.kz.
Bul týraly óńirlik kommýnikatsiialar qyzmetinde ótken baspasóz máslihatynda oblystyq mádeniet, tilderdi damytý jáne arhiv isteri basqarmasynyń basshysy Ernur Dáýenov málim etti.
«Qazaqstan Respýblikasynda ornatylatyn eskertkishter men monýmentter boiynsha Memlekettik komissiia Abai eskertkishiniń eskizin bekitti. Avtory - Asqar Nartov. Eskertkish ornatylatyn jer oblystaǵy ardagerler men sýretshilerdiń qatysýymen tańdaldy», - deidi Ernur Dáýenov.
Onyń aitýynsha, Oqýshylar saraiynyń aldynda adamdar demalatyn jaily oryndar bar. Mundaǵy negizgi ideia - oqýshylardyń sanasyna aqynnyń murasyn sińirý. Sýretshi sońǵy eskizderin bir aidyń kóleminde usynady. Sol kezde biiktigi týraly jáne basqa da tolyq aqparat beriledi. Qalalyq ákimdiktiń sheshimimen 2020 jyldyń biýdjetine Abai kóshesin abattandyrý jumystary engizilgen. Arnaiy bastamashyl top qurylyp, jeke menshik úilerdiń syrtyndaǵy oramdardy jóndeý boiynsha kelissózder júrgizetin bolady.
«Eskertkish Nur-Sultan qalasynda quiylady. Sáýletshimen kelisimshart jasalýda. Músin men tuǵyrdy quiýǵa, kóriktendirýge jabdyqtaýshy jaýap beredi», - dep atap ótti Ernur Dáýenov.
Aita keter jait, bul Asqar Nartov daiyndaǵan Abaidyń ekinshi músini. Alǵashqysy Qaraǵandy qalasyna ornatylǵan bolatyn.
