Erevan memlekettik ýniversiteti (EMÝ) janyndaǵy Qazaq tili, tarihy jáne mádenieti ortalyǵyna Abaidyń aty berildi.
Bul týraly QR Elshiligi QR Parlament Senaty tóraiymy Dariǵa Nazarbaevanyń atynan Ortalyqqa kompiýterlik tehnika men ádebi oqýlyqtardy tapsyrýǵa arnalǵan shara barysynda EMÝ rektorynyń mindetin atqarýshy Gegam Gevorkian málimdedi, dep habarlaidy QazAqparattyń menshikti tilshisi.
Erevandaǵy EMÝ janyndaǵy Qazaq tili, tarihy jáne mádenieti ortalyǵyna QR Senat tóraiymy Dariǵa Nazarbaevanyń atynan kompiýter, interaktivti taqta, sonymen qatar qazaq tilin úirenýge arnalǵan 120 qazaq sózdigi men jańa oqý materialdary tapsyryldy. Ortalyqqa arnalǵan kompiýterlik tehnikalar qazaq baǵdarlamalarymen jabdyqtalǵan, ol qazaq tilin úiretýdiń zamanaýi jáne tiimdi tásilderin paidalanýǵa kómektesedi. Shara barysynda Qazaqstannyń Armeniiadaǵy elshisi Timýr Ýrazaev EMÝ ákimshiligine, professor-oqytýshylar quramy men basshylyqqa qazaq tarihyn, mádenieti men tilin zertteýge qosyp júrgen úlesteri úshin alǵys aitty.
«175 jyldyq mereitoiy kezinde Abaidyń tilin jańa qurylǵylardyń kómegimen armian stýdentterine úiretý - qazaq ádebieti jáne poeziiasymen tanysyp, eki el arasyndaǵy mádeni sabaqtastyqty nyǵaitýǵa kómektesedi. Al Dariǵa Nazarbaevanyń Ortalyqqa bergen syijazbasy eki el arasyndaǵy mádeni-gýmanitarlyq qarym-qatynasty damytýǵa aq tilek bolady», - dep atap ótti shara barysynda elshi T.Orazaev.
EMÝ rektorynyń mindetin atqarýshy Gegam Gevorkian ýniversitet basshylyǵy Ortalyqqa Abai esimin berý týraly sheshim qabyldaǵanyn málimdedi.
«Byltyr biz erekshe oqiǵanyń kýási boldyq, «Qazaq ádebietiniń antologiiasy» armian tilinde jaryq kórdi. Bul eki eldiń ádebietshileri, ǵalymdary men lingvisteri seriktestiginiń ozyq úlgisi. Biyl Abaidyń 175 jyldyǵy mereitoiynyń kýásibolamyz»,- dep atap ótti akademik Gegam Gevorkian.
Sonymen qatar, ol shara barysynda ýniversitet basshylyǵy Ortalyqqa keńirek oryn qarastyratynyn aitty. EMÝ janyndaǵy Qazaq tili, mádenieti jáne tarihy ortylyǵy Qazaqstan Respýblikasynyń Armeniiadaǵy elshiliginiń qoldaýymen 2010 jyldyń 19 tamyzynda ashylǵan bolatyn.
